Ainaro-Ministériu Agrikultura Pekuária Peska no Floresta (MAPPF) liu husi Diresaun Nasional Agrikultura Hortikultua e Protesaun das Plantas lansa kuda ai-oan durian ektare 18 ho objetivu atu hasae produsaun frutikultura iha rai laran. Atividade kuda aioan ne’e realiza iha loron 13/01/26 iha aldeia Mausuka suku Maununu Munisipiu Ainaro.

Iha entrevista Ministru MAPPF Marcos “MAMETA” da Cruz esplika, atividade kuda ai-oan durian ne’e iha valor ekonomiku ne’ebe mak as, no ai-oan durian ne’e bele kuda iha klima ne’ebe mak malirin, ne’e duni ita halo selesaun ba area sira ne’ebe mak potensia ba ai-fuan.

Ministru hatutan, atividade kuda ai-oan ne’e importante tebes tanba Aihoris iha funsaun barak hanesan ai-tahan sira bele absorve no fo oksigen ne’ebe diak, no nia abuat bele proteze husi rai monu no nia fuan ne’e bele han no fan ba iha merkadu.

Ministru informa, ita nafatin kuda ai-oan nune’e bele proteze ita nia ambiente, ita mos orienta ba tekniku sira atu kuda ai-oan seluk ne’ebe mak bele produz fuan hodi bele fo benefisiu ba ita nia populasaun sira, tanba durante ne’e mos ita kuda ai-oan sira mak hanesan tanjerina, rambutan, has, salak, abukate no seluk tan ne’e mak durante ne’e ita kuda iha munisipiu sira ne’ebe mak potensia ba area frutikultura.

Ai-oan ne’ebe mak fo komunidade agrikultor sira kuda iha suku Manunu ne’e fornese husi Diresaun Nasional Hortikultura Protesaun das Plantas, hodi kuda ba rai ektare 18, no husu ba komunidade sira ne’ebe mak sai benefisiariu ba ai-oan sira tenki kuidadu nafatin ai-oan sira ne’e atu bele protese nafatin ita nia rai husi dezstre naturais, tanba governo iha nia komprimisiu atu nafatin tulun agrikultor liu atividade sira hanesan halo to’os ho natar, hakiak animal, hakiak ikan atu nue’e bele hasae produsaun iha seitor hat hansan agrikultura pekuaria, peska no Floresta. Tenik Ministru.

Iha fatin hanesan Xefe suku Maununu Velente Ramos Bianco, hato’o agradese ba Ministru MAPPF ho ekipa sira ne’ebe mak iha vontade tebes hodi kuda ai-oan durian iha suku refere, ne’ebe mak kompostu husi aldeia tolu hanesan Mamalau, Aileu no Mausuka ne’e mak sai potensia ba iha area agrikultura no frutikultura, husu mós ba parte MAPPF atu bele apoiu mos ekipamentu ba iha suku Maununu hodi bele utiliza ba halo to’os ho natar atu bele hasae produsaun iha seitor agrikultura.

Nune’e mos Diretora Servisu Agrikultura Municipal (DSAM) Ainaro Aguida Judit Mendonça informa, atividade kuda ai-oan durian iha suku Maununu munisipiu Ainaro ne’e sai hanesan pilotu no tuir plano sei kuda ba iha suku sira seluk ne’ebe mak potensia ba frutikultua.