Ainaro, 13 Janeiru 2026 – Ministru Agrikultura, Pekuária, Peskas no Florestas (MAPPF) Marcos “MAMETA” da Cruz entrega ekipamentu agríkola hanesan tratór bo’ot ho unidade rua (2) bá reprezentante Prezidente Autroridade Munisípal Ainaro hodi bele apoiu bá komunidade agrikultór sira atu bele hasa’e produsaun agrikola iha Munisípiu Ainaro.

Iha entrevista Ministru MAPPF esplika, tratór bo’ot unidade rua ne’ebé sosa ho Orsamentu Jerál Estadu (OJE) nian iha tinan 2025. Ministério iha tratór hamutuk unidade 25 mak distribui ona bá Munisípiu sira inklui Munisípiu Ainaro hetan rua.

Ministru haktuir, programa entrega mákina modernu bá Munisípiu sira liu husi Diresaun Servisu Agrikultura atu bele ajuda agrikultór sira utiliza ekipamentu sira ne’e hodi koa rai ka fila rai. Tanba iha Ainaro mós rai potensia bá agrikultura bo’ot tebes hanesan iha Bonuk, Rai-bere, Casa no mós iha suku Mau-nunu no suku Leo-Golo tanba ne’e presiza dezenvolve liu husi apoiu tratór sira atu bele aumenta produsaun iha to’os ho natar.

Ainaro iha tratór hamutuk unidade 20 inklui tratór rua ne’ebé foin fahe tan, maibé iha tratór lima (5) mak la bele hadi’a ona. Tanba tratór sira ne’e Ministériu apoiu kedan iha 2008-2009 ninia kustu atu halo manutensaun ne’e, boot liu fali kustu atu sosan foun, tanba ne’e Ministériu sei entrega bá patrimóniu Estadu hodi halo lelaun, gora iha tratór unidade 15 mak sei utiliza hela hodi halai natar ka koa rai, inklu tratór unidade lima (5) foun kompostu unidadede tolu 3 ne’ebé MAPPF entrega iha tinan uluk no mós tratór unidade rua ne’ebé foin distribui tan ne’e.tenik Ministru MAPPF.

Iha fatin hanesan Reprezentante PAM Ainaro, Augostinho Doutel Sarmentu hato’o agradesimentu bá Ministru MAPPF tanba ninia esforsu tomak bele apoiu tan mákina ba Munisipio Ainaro, no iha tinan kotuk Ministériu apoiu ona mákina unidade tolu, agora fó tan rua ne’e atensaun ida ne’ebé boot tebes husi Ministério.

Nia mos husu ba komunidade sira kontinu hato’o nafatin preokupasaun, ba iha Ministério relevante atu apoiu nafatin sasan saida mak komunidade Agrikultór sira presiza hodi prodús ai-han barak liu tan iha Munisipio Ainaro, nia mos promote katak ekipamentu sira ne’ebé maka governu liu husi MAPPF entrega sira sei halo esforsu nafatin hodi tau matan atu halo jestaun ho di’ak.

Iha serimonia intrega ekipamentu agríkola modernu ne’e, partisipa mós husi Sekretáriu Estadu Floresta, Komandante PNTL Munisípiu Ainaro, Diretór Jerál Agriklultura Kafe Plantas no Indústria, Diretór Nasionál Hortrikultura, Diretora Servisu Agrikultura Munisípiu Ainaro, parte Igreja, no funsionáriu sira. Ekipa DMEA