Dili, 16 Janeiru 2026 - Ministru Agrikultura, Pekuária, Peskas no Florestas Marcos "MAMETA" da Cruz, akompaña husi Sekretáriu Estadu Pekuária no Dirijente sira, hala'o enkontru ho investór husi Xina ho naran Jung Chao Technologi ne'ebé hakarak investe iha seitor agrikultura.

Iha entrevista Ministru Agrikultura Pekuaria Peska no Floresta Marcos ''MAMETA'' da Cruz esplika, Ministerio hetan vizita husi investór ida husi Xina , ho naran Jung Chao Technologi, sira hakarak investe iha Timor, liul-iu setór Agrikultura ho du'ut ida ne'ebé bele prodúz kulat, bele prodúz ai-han bá animál no buat seluk-seluk tan, inklui sira nia hena ka tais ne'ebé ohin fó mai ita ne'e, 70% halo husi du'ut.

Ministru Marcos MAMETA dehan, Jung Chao Technologi ne'e, sira nia investimentu perkore ona iha nasaun 100-resin iha mundu, inklui Papúa nova guine no Afrika. Ne'e duni liu husi audénsia ne'ebé realiza dau - daun ne'e, parte Ministériu aprezenta mós problema no difikuldade ne'ebé iha katak, Ministériu hakarak dezenvolve iha setór Agrikultura, Pekuária, Peskas no Florestas liuliu bele hetan auto-sufisiente bá ai-han ka seguransa alimentar.

"Ita nia problema barak mak ita sei halo importasaun, Tanba ne'e ita presiza aumenta produsaun iha area Agrikultura,Pekuária, Peskas no Florestas atu nune'e ita labele infrenta beibeik problema ai-han". Tenik Ministru.

Governente ne'e dehan, du'ut ne'ebé investór China prodúz iha provinsia Fujian ne'ebá, sei ajuda hodí dezenvolve setór Agrikultura liu-liu iha setór Pekuária. no parte rua iha ona konkordánsia depois remata audénsia ne'e parte rua sei nomeia ida-idak ninia pontu vokál atu kontinua halo dizkusaun detallada teknikamente, atu nune'e bele kontinua selebra akordu ka MoU iha futuru, Tanba bainhira investór ida atua tau nia osan ka halo investimentu iha area ruma presiza ko'alia bá malu hodi halo planu ida di'ak liu, atu nune'e investór refere bele haruka ninia ekipa sira halo ona servisu liu husi identifikasaun bá rai potensia iha Timor. Ekipa DMEA