Sua Eselénsia Sekretáriu Estadu Sr. José Vieira de Araújo ho ekipa halo vizita ba Grupu Agalija ne’ebe mak hakiak animal fahi iha Aldeia Sukabi laran, Suku Suai Loro, Postu Administrativu Suai Vila, Munisípiu Covalima.

Objetivu husi vizita ida ne’e atu hare direta kondisaun luhan no saúde bázika animal nian atu nune’e labele hetan moras.

Iha vizita ne’e observa katak luhan animal ne’ebe mak grupu konstrui la kumpri rekezitus balun hanesan bio-seguransa, fatin soe foer la diak no la ijiéniku.

Iha fatin hanesan Xefi Grupu Agalija hatete katak sira nia grupu hetan apoiu husi Ministériu Dezenvolvimentu Rurál no Abitasaun Komunitária hodi hakiak animal. Maibe sira la hetan kontrola husi tékniku Pekuária ka Veterinária sira.

"Ami hetan apoiu husi Ministériu Dezenvolvimentu Rurál no Abitasaun Komunitária hodi hakiak animal hanesan fahi maibe to’o agora tékniku Pekuária ka Veterniária la mai hare no kontrola ami nia luhan ho animal sira, no ami nia fahi barak mak mate kauza husi moras".

Hatan ba preokupasaun, governante ne’e hatete katak Ministériu Dezenvolvimentu Rurál no Abitasaun Komunitária nia programa ne’e diak, maibe iha Centru Dezenvolvimentu Aldeia (CDA) presiza kordena no involve tekniku pekuaria no veterinaria sira iha munisipiu, nune'e sira bele servisu hamutuk hodi bele fó asisténsia tékniku ba grupu hakiak nain, molok fo apoiu.

Governante ne'e mos salienta tan katak nia parte, atravez Ministru Agrikultura, Pekuária, Peska no Florestas, sei koalia ho Ministru Dezenvolvimentu Rurál no Abitasaun Komunitária hodi hare assuntu refere.

Tambá ne’e governante ne’e sujere ba grupu sira tenki kontaktu ba pesoal tékniku Pekuária no Veterinária iha Munisípiu Covalima hodi hare rekezitus ka estandariza luhan animal nian hanesan bio-seguransa, saúde bázika animal inklui tratamentu animal sela’e imi nia fahi sei mate hotu tamba la kumpri regras hakiak sira.