Iha loron 19 fulan-janeiru tinan 2026, Ministru Prezidénsia Konsellu Ministrus no Ministru Negósius Estranjeirus ein ezersísiu, Agio Pereira, simu Vise-Ministra Negósius Estranjeirus Repúblika Demokrátika Populár Laos, Phongsamouth Anlavan no ninia delegasaun, iha ámbitu husi ninia vizita ofisiál mai Timor-Leste husi loron 18 to’o 22 fulan-janeiru tinan 2026. Sorumutu ne’e mós marka  prezensa husi Vise-Ministra ba Asuntus ASEAN, Milena Maria da Costa Rangel, Embaixadór Timor-Leste iha Laos, João Freitas da Câmara no reprezentante sira seluk husi Ministériu Negósius Estranjeirus no Kooperasaun. 

Sorumutu ne’e ho objetivu atu halo diálogu kona-ba hametin relasoins bilaterais entre Timor-Leste no Repúblika Demokrátika Populár Laos, nune’e mós troka ideia kona-ba asuntu ba interese komún iha planu rejionál no multilaterál. Parte rua ne’e analiza kondisaun kooperasaun bilaterál no aborda oportunidade sira atu aprofunda kolaborasaun iha área sira hanesan kooperasaun ekonómika no téknika, agrikultura, dezenvolvimentu rekursus umanus no interkámbiu entre instituisaun sira.

Iha sorumutu ne’e, Ministru Agio Pereira hato’o benvindu ba Vise-Ministra Phongsamouth Anlavan no ba delegasaun ne’ebé akompaña nia, hodi reafirma kompromisu Timor-Leste nian ba aprofundamentu relasoins bilaterais. Ministru agradese mós ba Governu Laos ba ninia apoiu adezaun Timor-Leste nian ba ASEAN, marka istórika ida ne’ebé ofisialmente konkretiza durante Prezidénsia Malázia, iha loron 26 fulan-outubru tinan 2025.

Sira ko’alia mós kona-ba medidas konkretas husi reforsu kooperasaun diplomátika, inklui disponibilizasaun terrenu ida iha Dili, husi parte Governu Timor-Leste, atu harii Embaixada rezidente Repúblika Demokrátika Populár Laos nian iha futuru, hanesan espresaun hodi hametin relasoins bilaterais. Parte rua ne’e ko’alia mós kona-ba rejime livre vistu ba titulár pasaporte diplomátiku, ofisiál no komún sira, ne’ebé fasilita mobilidade no kontaktu entre país rua ne’e.

Timor-Leste no Repúblika Demokrátika Populár Laos mantein relasaun diplomátika formál dezde fulan-jullu tinan 2002. Nu’udar parte ida atu hametin parseria rejionál, Timor-Leste inaugura ninia Embaixada rezidente iha Vientiane iha fulan-jullu tinan 2014, hodi reflete kompromisu ho hakle’an relasoins bilaterais no kooperasaun iha kontestu ASEAN.

https://timor-leste.gov.tl/?p=46902&lang=tp&n=1