Inskrisaun ba grupu datoluk hosi programa lideransa nasionál Timor-Leste nian, Futuru Lider Ba ASEAN (FLBA), sei loke online iha loron 12 to’o 20 fulan-janeiru 2026.

FLBA nu’udar programa dezenvolvimentu lideransa durante fulan 12 ba futuru lider selesionadu na’in-100 ho idade 27 to’o 38.

Ne’e finansia tomak husi Governu Timor-Leste no ho objetivu atu prepara jerasaun lider sira tuirmai husi setór no munisípiu hotu-hotu ba integrasaun iha ASEAN no dezenvolvimentu nasionál ba longu prazu. Programa FLBA ne’e organiza husi Ministériu Negósius Estranjeirus no Kooperasaun Timor-Leste, espesifikamente iha diresaun diária Vise-Ministra ba Asuntus ASEAN nian.

Programa FLBA dahuluk lansa husi governu iha tinan 2024 hodi prepara jerasaun tuirmai Timor-Leste ba lideransa iha ASEAN no abilidade atu lidera nasaun nia dezenvolvimentu ba tempu naruk. Grupu rua dahuluk kontribui maka'as, iha 2024 no 2025, atu prepara Timor-Leste nia adezaun ba ASEAN, ne'ebé konkretiza iha loron 26 fulan-outubru 2025.

FLBA maka programa dezenvolvimentu ho nivel mundiál ne'ebé ezije partisipante sira atu marka prezensa iha sesaun formasaun hotu-hotu, konklui tarefas ezijente lubuk ida, no partisipa iha viajen imersaun semana ida ba rai-li'ur ba nasaun sira ASEAN nian. Partisipante sira ne'ebé la prienxe rekizitus sei la elejivel ba sertifikasaun FLBA iha programa nia rohan.

Laiha kustu formasaun ba kandidatu sira ne'ebé maka selesionadu. Viajen ba kontaktu imersaun iha ASEAN mós gratuita ba partisipante sira. Maibé, partisipante sira tenke konklui tarefa hotu-hotu no workshop sira husi programa ne’e.

Ba ministériu no organizasaun sira ne'ebé emprega partisipantes ne'ebé tuir programa FLBA, benefísiu sira inklui kapasidade lideransa ne'ebé aumenta, preparasaun internasionál, networking lideransa no dezenvolvimentu karreira lideransa nian. Liuhusi sira-nia futuru lider sira, organizasaun sira Timor-Leste nian, hosi setór hotu-hotu, hanesan parte hosi rede ida ne’ebé lidera dezenvolvimentu estratéjiku nasionál. Maibé, organizasaun patrosinadór sira presiza asina karta ida ne'ebé autoriza kandidatus atu partisipa ho livre iha atividade no tarefa sira FLBA nian.

Rekizitu ba kandidatu sira

Partisipante sira selesiona ho kuidadu liuhosi prosesu kandidatura ida, karta rekomendasaun hosi organizasaun patrosinadora no entrevista individuál. Laiha diskriminasaun bazeia ba afiliasaun partidária ka relijiaun. Kritérius diversidade nian inklui ekilíbriu jéneru, reprezentasaun jeográfika husi nasaun tomak no inkluzaun ema ho defisiénsia.

Partisipante sira tenke:

• Ho idade entre 27 no 38.

• Ko'alia Inglés ho fluénsia (kursu no tarefa hotu-hotu iha Inglés).

• Hatama, iha formuláriu kandidatura, karta rekomendasaun hosi patrosinadór ida ho nivel lideransa iha ninia organizasaun.

Prosedimentu kandidatura

Hahú iha loron 12 fulan-janeiru, ita-boot bele uza link ida-ne'e atu prienxe formuláriu inskrisaun online ba grupu FLBA da-3 nian:

Kandidatu sira tenke prenxe formuláriu kandidatura online FLBA nian (nota importante: kandidaturas taka iha meianoite iha loron 20 fulan-janeiru).

Karta rekomendasaun ne’ebé asina husi patrosinadór tenke upload (hatama) ba formuláriu kandidatura iha formatu PDF.

Prova kona-ba fluénsia Inglés. Atu prova ita-boot nia nivel fluénsia, ita-boot bele uza ita-boot nia pontuasaun teste Inglés nian (se ita-boot iha ida) ka deskrisaun badak ida kona-ba ita-boot nia fluénsia iha Inglés, bazeia ba ita-boot nia edukasaun/formasaun no esperiénsia profisionál.

Rezultadu kandidatura online sei anunsia liuhusi email iha loron 25 fulan-janeiru. Entrevista ho kandidatu sira ne'ebé maka selesionadu sei hala'o iha MNEC, hahú iha loron 28 fulan-janeiru to'o loron 4 fulan-fevereiru tinan 2026.

Ba esklaresimentu pergunta sira ka atu kontakta painél selesaun nian, favór uza email ida-ne'e: cohort1.flba@gmail.com

https://forms.gle/kGJDVmk6nN1hVkXZA