Dili, 05 Janeiru 2026 – Primeiru-Ministru (PM), Kay Rala Xanana Gusmão, lidera serimónia solene hasa’e Bandeira Nasionál dahuluk ba tinan 2026 ne’ebé hala’o iha resintu Palásiu Governu, Segunda-feira ne’e. Serimónia ne’e nu’udar marka dahuluk hodi hahú tinan foun ho espíritu dedikasaun no transformasaun foun ba nasaun.

Iha serimónia solene ne’e, Vise-Ministru ba Asuntus Parlamentares (VMAP), S.E. Adérito Hugo da Costa, marka prezensa hamutuk ho membru Governu sira seluk hodi rona diretiva husi Xefe Governu. Partisipasaun VMAP nian reafirma fali kometimentu Gabinete nian hodi asume responsabilidade boot iha tinan 2026, liuliu iha kordenasaun estratéjika no servisu ligasaun entre Governu ho Parlamentu Nasionál ne’ebé bazeia ba kualidade no integridade.

Gabinete VMAP prontu atu implementa vizaun Primeiru-Ministru nian hodi hadi’a kualidade servisu, asegura katak prosesu lejizlativa no relasaun institusionál la’o ho efisiénsia hodi fó benefísiu ba povu Timor-Leste tomak.

Iha diskursu ba membru Governu no funsionáriu hotu, PM Xanana hato’o mensajen ne’ebé kle’an kona-ba transformasaun pesoál no profisionál. Xefe Ezekutivu enfatiza katak xave ba dezenvolvimentu nasionál mak mudansa iha “kakutak” ka mentalidade.

“Ita presiza mudansa iha atitude, mudansa iha servisu, no dedikasaun. Reflesaun ba futuru mak ne’e: se ita servisu ho di’ak no servi ho di’ak, ita sei sai fali heroi ba ita-nia oan sira. Mai ita hadia kakutak, hadia servisu, hadia responsabilidade, no hadia kompromisu,” dehan PM Xanana ho firme.

Nia mós husu ba ajente administrasaun Estadu sira atu labele hanoin de’it ba an rasik no família, maibé tenke hanoin fali sakrifísiu heroi sira nian ne’ebé fó ona sira-nia vida ba rai-laran hodi hetan ukun-an.

Primeiru-Ministru subliña katak tinan 2026 tenke sai tinan ne’ebé la hanesan ho tinan sira liubá. Mudansa mentalidade mak xave primeiru hodi garante katak dezenvolvimentu ne’ebé Governu hala’o lori duni benefísiu ba povu tomak.

Serimónia ne’e ramata ho ambientu ne’ebé nakonu ho dignidade, ne’ebé partisipa mós husi funsionáriu sira husi Gabinete PM, Vise Primeiru-Ministru, Ministru Koordenadór sira, Komisaun Funsaun Públika (KFP), hamutuk ho farda sira husi PNTL no F-FDTL. (©MediaGVMAP).

Fontes: https://vmap.gov.tl/2026/01/05/vmap-akompana-pm-xanana-iha-serimonia-hasae-bandeira-dahuluk-iha-tinan-2026-hadia-kompromisu-hodi-sai-heroi-ba-futuru/