Dili dia 8 Janeiru 2026 ; SEFOPE-DNEE hala'o seremónia despedida ba trabalhadór nain-34 ne'ebé sei mobiliza ba servisu iha Austrália. Total trabahadór nain-34 ne'e kompostu husi trabalhadór retornu nain-32 no trabalhadór foun nain-2 (feto 8, mane 26). Sira sei serbisu iha kompania sira hanesan MADEC, ADCO Job Shop no Covino Farm.

Iha seremónia ida ne'e, hetan prezensa direta husi Diretór Nasionál Empregu Estrangeiru (DNEE), Sr. João Correia, inklui Chefe Departamentu Deslokasaun, Sr. Alarico Fernandes, Koordenador LSU, Sr. Euliterio Borges, D.S C. Lemos, no mós reprezentante PLMSP.

Iha sesaun diskursu Diretór Nasionál Empregu Estrangeiru (DNEE), Sr. João Correia, hato'o mensajen importante ba trabalhador sira no sira nia família, hanesan tuir mai ne'e:

"Hau nia hakoak boot ba ita boot sira, lori Estadu nia naran husu ba ita boot sira atu aproveita didi'ak oportunidade ida ne'e. Servisu ho responsabilidade tomak atu ita boot sira bele susesu iha futuru. DNEE liu husi departamentu Reintegrasaun iha papel importante ida mak atu buka tuir trabalhador retornu ne'ebé susesu hodi kontinua fó apoiu ba sira, atu bele garantia sustentabilidade longu prazu ba sira nia atividade investimentu ne’ebé sira halao hela no sei halao iha futuru ."

Diretór mos husu ba família sira atu suporta sira nia oan :

"Ba família sira, buka atu komprende kondisaun no situasaun ne'ebé imi nia oan sira hasoru iha sira nia servisu fatin. Kria komunikasaun ne'ebé saudável ho sira, liuliu halo orasaun beibeik ba sira atu sira bele dezempenha ho di'ak no mantén kondisaun saúde ne'ebé saudável."

Iha rohan husi diskursu, Diretór fo hanoin ba trabalhador sira katak: "Favor hanoin dala rua antes ita boot sira atu halo aksaun negativa ruma iha Australia ka iha ne’ebe deit, tanba ita boot lori bandeira Timor-Leste, ita boot sira nia papel krusiál tebes atu garante konfiansa empregador, hodi hasa'e numeru trabalhador husi ita nia rai. Servisu ho kuidadu, hatudu dezempenha ne'ebé di'ak. Estadu iha esperansa ida de'it katak ita boot sira bele ganha konfiansa husi empregador sira, atu nune'e bele loke oportunidade ba Timoroan sira seluk ne'ebé hein hela oportunidade ida ne'e."

Seremonia despedida nu’udar tradisaun ida ne’ebé Governu liu husi DNEE sempre realiza antes haruka haruka trballador sir aba servisu iha rai liur.