Dili, 12 janeiro 2026 – Deputada Mariquita Soares, husi Bankada FRETILIN, hato’o preokupasaun no lian husi funsionáriu permanente, ajente administrasaun no kontratadu sira kona-ba atrasu no la kompletu simu saláriu iha ministériu balu.

Iha ninia intervensaun ba kestaun ne’e, Vise-Ministru Asuntus Parlamentáres, S.E. Adérito Hugo da Costa, agradese ba Komisaun C Parlamentu Nasionál tanba iha iniciativa di’ak atu bolu Ministra Finansas mai fó esplika detallada ba Deputadu sira no povu iha Parlamentu Nasionál, relasiona ho kestaun saláriu fulan ikus tinan 2025 nian ne’ebé funsionáriu sira seidauk simu no balu simu la kompletu.

Relasiona ho asuntu ne’e, Konsellu Ministru hala’o reuniaun estraordináriu ida iha segunda-feira ne’e, hodi analiza dadus ne’ebé Ministériu Finansa aprezenta kona-ba prosesu regularizasaun ba pagamentu saláriu désimu terseiru tinan 2025 nian.

Iha sorumutu ne’e mos, KM deside hasai ka foti millaun $4,5 husi Orsamentu Jerál Estadu (OJE) 2026 hodi halo pagamentu estraordináriu (ba saláriu 13°) no saláriu negativu (mensál) hahú husi Outubru to’o Dezembru 2025.

Sesaun Plenária ordinária ne’e realiza iha Parlamentu Nasionál, Dili, iha loron Segunda-feira, 12 fulan-Janeiru tinan 2026. (©MediaGVMAP)

Fontes: https://vmap.gov.tl/2026/01/12/komisaun-c-sei-bolu-ministra-relasiona-salario-funsionariu-sira/