Ohin loron , 13 Janeiru 2026; Diretór Diresaun Nasionál Empregu Estranjeiru (DNEE) Senhor João Correia Pereira ho entusiasmu partisipa iha sesaun Pre-Departamentu (PDB) dahuluk iha tinan 2026 , ba trabalhador Timor-Oan nain 126. Sesaun ida ne’e hanesan pilar importante ida ne’ebé SEFOPE, liuhosi DNEE, sempre realiza regularmente antes de haruka trabalhador sira ba servisu iha Austrália.

Objetivu PDB ne'e mak atu fahe informasaun esensiál kona-ba direitu no dever, lei, kultura, no sistema servisu ne’ebé trabalhador sira sei hasoru iha Austrália. Aleinde ne’e, fó mos formasaun kona-ba literasia finansiamentu, atu nune’e bele ajuda trabalhador sira utiliza rekursu ne’ebé sira sei hetan husi programa PALM hodi bele halo planu investimentu ne'ebe bele garantia sutentabilidade iha futuru , Diretór hato’o mensajen Xave (importante) no inspirasaun ba trabalhador sira: “Parabéns ba ita boot sira hotu. Oportunidade ne’ebé ita boot sira hetan, maski ki’ik, ,maibe karik ita boot sira uza ho diak, no kuidadu bele sai boot no sustentável iha futuru—liuhosi investimentu iha negósiu ka hari uma ba ita boot nia família. Servisu ho responsabilidade, kumpre no adapta ba regra, lei, no kultura iha Austrália. Ita boot sira tenke kaer prinsípiu ida katak: ita boot sira mak sai ezemplu ba Timor-Oan sira seluk. Bainhira ita hatudu desempeñu diak, signifika katak ita hametin konfiansa husi empregador sira ba Estadu Timor-Leste. Konfiansa ne’e sei ajuda hasa’e numeru trabalhador husi Timor-Leste ne’ebé sei

ba servisu iha futuru.”

Aleinde ne’e, Diretór mos fó apresiasaun boot ba trabalhador sira, hateten katak, “Ita boot sira sai nu’udar pilar no erói importante ida ba dezenvolvimentu ekonómiku iha Timor-Leste. Estadu sempre sura (rekoñese) mós ita boot nia kontribuisaun ba progresu ekonómiku iha rai ida ne’e.”