Dili loron 15, fulan-Janeiru, tinan 2026, Sekretáriu Estadu ba Formasaun Profisionál no Empregu Interinu, Sua Exelénsia Domingos Lopes Lemos, Atual Sekretáriu Estadu ba Ensinu Sekundaria, partisipa iha serimònia asina deklarasaun no despedida ba traballadór Timor-oan na'in 85 molok ba servisu iha Korea súl.

Iha serimònia Sekretáriu Estadu ho esperansa boot hateten ba traballadór sira, ba servisu iha ema nia rai kuidadu an atu nune'e loron ida sei fila mai Timor-Leste ho kondisaun ne'ebé diak hodi dezenvolve rai ida ne'e.

"Ita espera katak, imi nain 85 ba servisu kuidadu an atu nune'e imi sei fila fali mai ho kondisaun ida ne'ebé mak agora daudaun imi iha ne'e, imi tenke fiar an katak hau sei fila fali mai Rai Timor-Leste atu dezenvolve hau nia rai, tanba imi nia kontribuisaun importante tebez ba rai ida ne'e," Hateten Sekretáriu Estadu iha serimònia Despedida ne'ebé hala'o iha Salaun Timor Logde Dili.

Sekretáriu Estadu interinu fundamenta katak, imi nia familia prontu husi imi ba buka moris iha ema nia rai, atu nune'e bainhira imi fila mai atu hare fali sira, laos ba servisu hodi hare fali ba ema seluk.

"Inan aman fen ho oan prontu husi hela imi tinan naruk nia laran para nune'e imi fila mai sustenta fali sira nia moris iha ita nia rai, laos sira nia matan ben monu iha Aeroportu ne'ebá imi ba servisu sustenta fali ida iha sorin mak hetan fali osan, inan ama la hein hela osan, maibe osan ba monu fali iha fatin seluk ne'e problema boot,"renik atual Sekretáriu Estadu ba Ensinu Sekundaria.

Iha serimònia ne'e partisipa husi Reprezentante HDR Korea iha Timor-Leste, Xefe Gabinete, Diretor Jerál, Director Nasionál Empregu Estranjeiru no Director Nasionál sira seluk no inan aman husi traballadór.