Komandu Jerál Polícia Nasionál Timor-Leste (PNTL) iha mekanizmu internál no regra disiplinár rasik atu trata kualker atuasaun husi membru PNTL wainhira viola regra disiplinár ka komete krime.

Afirmasaun ne’e hato’o husi Vise-Ministru Asuntus Parlamentáres, S.E. Adérito Hugo da Costa, iha Sesaun Plenária Parlamentu Nasionál, Segunda-feira, loron 12 fulan-Janeiru tinan 2026, iha períodu antes Órden do Dia, hodi hatan ba deklarasaun polítika husi Bankada KHUNTO relasiona ho atuasaun polísia ne’ebé konsideradu la neutru iha konfrontu entre joven sira husi suku Soro no Manu-Tasi, iha Munisípiu Ainaro, loron 31 fulan-Dezembru tinan 2025.

Iha deklarasaun polítika Bankada KHUNTO, Deputadu António Verdial lamenta tebes atuasaun polísia ne’ebé hakanek joven ida ho naran Leonito, husi suku Soro, no konsidera katak polísia la halo atuasaun ho neutralidade tanba inklina liu ba joven sira husi suku Manu-Tasi iha konfrontu ne’e.

Iha parte seluk, Deputadu Mariano Malik husi Bankada PD lamenta deklarasaun polítika husi Bankada KHUNTO nian ne’ebé fó sala de’it ba parte polísia, enkuantu realidade hatudu katak membru polísia nain tolu (3) mós hetan kanek iha konfrontu refere ne’e.

Vise-Ministru Asuntus Parlamentáres reforsa katak kazu ne’e atende ona husi Komandu Jerál PNTL no prosesa tuir mekanizmu no regra disiplinár ne’ebé vigór.

Governante ne’e mós haktuir katak Primeiru-Ministru rasik aprezenta ona informasaun, hafoin simu relatóriu husi Komandu Jerál PNTL kona-ba servisu seguransa, ne’ebé hatudu katak situasaun seguransa iha tinan ikus la’o ho di’ak maibé disturbansa iha Ainaro mosu wainhira

joven sira hamutuk hodi festeja loron boot, no depois akontese problema baku malu tanba dezentendimentu.

Tuir fonte notísia husi PNTL, Komandu PNTL rejista ona kazu ne’e iha Ministériu Públiku Covalima no identifika ema nain sanulu (10), inklui xefe suku ida, hanesan suspeitu.

Iha biban ne’e, Vise-Ministru Asuntus Parlamentáres, S.E. Adérito Hugo da Costa, agradese no apresia servisu husi forsa seguransa PNTL, Força Defesa Timor-Leste (F-FDTL), inklui lider komunitáriu sira iha territóriu nasionál tomak, tanba kria kondisaun no ambiente ne’ebé seguru, nune’e populasaun bele selebra Natal no Tinan Foun ho di’ak no livre.

Alén husi kestaun seguransa, membru Órgaun Lejislativu sira mós levanta kestaun sira seluk hanesan infraestrutura bázika, saúde no área sosiál seluk.

Sesaun Plenária ordinária ne’e prezidi husi Prezidente Parlamentu Nasionál, Sra. Maria Fernanda Lay, ho prezensa Deputadu sira husi bankada parlamentár hotu-hotu ne’ebé iha asentu iha Parlamentu Nasionál. (©MediaGVMAP)

Fontes: https://vmap.gov.tl/2026/01/12/pntl-iha-mekanizmu-disiplinar-atu-halo-atuasaun-ba-membru-sira-wainhira-komete-krime/