𝗗Í𝗟𝗜, 𝗠𝗝 — 𝗧𝗲𝗿𝘀𝗮-𝗳𝗲𝗶𝗿𝗮, 𝟮𝟬 𝗝𝗮𝗻𝗲𝗶𝗿𝘂 𝟮𝟬𝟮𝟲, Governu Timor-Leste, liuhosi Ministériu Negósiu Estranjeiru no Kooperasaun (MNEK) no Ministériu Justisa, fó espasu hanesan rai no edifísiu ba Governu Laos hodi estabelese sira-nia Embaixada iha Fárol, Díli, Timor-Leste.

Governu Timor-Leste liuhosi Sua-Eselénsia Ministru Justisa, Dr. Sérgio Hornai hamutuk ho Sua-Eselénsia Vise-Ministra ba Asuntus ASEAN, Milena Maria da Costa Rangel entrega rai no edifísiu ida-ne’e, hodi hametin kooperasaun entre Nasaun rua-nian.

“Rai no edifísiu ne’ebé oferese ba Governu Laos, hodi estabelese Embaixada iha ne’e, nu’udár respeitu mútua no kooperasaun fraternu entre Timor-Leste no Nasaun Irmaun Laos. Governu Timor-Leste liuhosi Ministériu Justisa, hakarak hato’o sentidu agradesimentu sinseru ba hotu-hotu ne’ebé kontribui no kooperasaun ba nasaun rua halo ona.” Ministru Justisa hateten.

Ministru Justisa, Dr. Sérgio Hornai afirma, nu’udár Ministeriu ida ne’ebé responsabiliza ba rai no propriedade hotu iha ne’e koordena ho MNEK hodi oferese rai no edifísiu hanesan respeitu ida ne’ebé Timor-Leste halo ba Governu Laos hodi hala’o misaun diplomata iha Timor Leste.

Nune’e Povu Repúblika Demokrátika Populár Laos no Povu Timor-Leste, bele estabelese amizade Polítika, Kultural, Ekonomia no Sosial hodi kontinua halo promosaun no kooperasaun bazeia iha prinsipiu reseprosidade ninian.

Iha serimónia entrega rai no edifísiu ne’e, ofisialmente loke odamatan edifísiu hosi Sua-Eselénsia Vise-Ministra Negósius Estranjeirus Repúblika Demokrátika Populár Laos, Phongsamouth Anlavan ne’ebé akompaña másima hosi ninia delegasaun sira. Nune’e mós korpu diplomata sira, Prezidente Autoridade Munisipál Díli no funsionáriu sira hosi Ministériu Negosiu Estrajeiru no Kooperasaun.

# 𝗠í𝗱𝗶𝗮 𝗚𝗮𝗯𝗶𝗻𝗲𝘁𝗲 𝗠𝗶𝗻𝗶𝘀𝘁𝗿𝘂 𝗝𝘂𝘀𝘁𝗶𝘀𝗮 #

Fontes: https://www.facebook.com/share/p/17NKRcB1rC/