Dili, loron 21 fulan Janeiru 2026 – Sekretariadu Estadu ba Formasaun Profisionál no Empregu (SEFOPE), liu husi Diresaun Nasionál Empregu Estranjeiru (DNEE) ne'ebé lidera husi Diretór João Correia Pereira, hamutuk ho Primeira Sekretária Embaixada Australia Sra. Kalo Tafolo akompáña husi Adidu Traballu ba Austrália, Sr. Rofino, hala'o vizita ba atividade teste fíziku no intervista ba kandidatu traballadór PALM iha Hotel Ramelau no PALM Springs Dili.

Iha sesaun ida ne'e, Diretór DNEE no Primeira Sekretária husu ba kandidatu sira atu uza oportunidade ida ne'e ho di'ak, hodi nune'e bele selesionadu husi empregador rasik. Diretór fundamenta katak “SEFOPE ninia papel atu suporta de'it empregador ninia desizaunsira kona-ba rekrutamentu no mobilizasaun. Desizaun ita-boot sira atu selecionadu ka la selecionadu ida ne'e absolutamente empregador sira-nia kompeténsia. Maibé hanesan Estadu, hau enkoraja ita-boot sira uza oportunidade ida ne'e hodi demonstra imi-nia potensiál tomak, atu nune'e empregador bele rekruta bazeia ba sira-nia rekerimentu rasik,” dehan diretór.

“RWM espera atu seleciona traballadór sira ne'ebé prienxe ami-nia rekizitu, tanba ami hakarak tebes atu hare kontribuisaun no atinjimentu signifikativu ne'ebé trabaladór foun Timor-oan sira sei atinji iha tinan 4 oin mai. Ami dezéja boa sorte ba kandidatu sira hotu ne'ebé partisipa iha teste ida ne'e,” dehan Sr. Suli Patterson , reprezentante Empregador RWM.

Teste ida ne'e inklui teste fíziku no intervista ne'ebé hala'o diretamente husi empregador RWM no Cable Beach, no hetan suporta husi funsionáriu LSU-DNEE. Kompañia RWM hala’o teste ba kandidatu hamutuk 129, no kandidatu 76 partisipa iha teste husi kompania Cable Beach .