Iha lia menon abertura, Diretor Nasional Extensaun no Formasaun Agríkola, Sr. Januario Marcal, hato’o apresiasaun kle’an ba partisipante sira hotu ne’ebé marka prezensa iha enkontru estratéjiku ida-ne’e.

Nia hateten katak, enkontru ne’e la’ós de’it fórum tékniku ida, maibé momentu krusiál atu prepara rekursu umanu agríkola ba futuru Timor-Leste nian, liuliu iha kontektu transformasaun no modernizasaun setór agrikultura.

Diretor subliña katak bazeia ba Sensus Agrikultura 2019, maioria agrikultór sira iha nível edukasaun ki’ik, ne’ebé sai dezafiu boot ba mekanizasaun no digitalizasaun agrikultura. Maibé ida-ne’e mós sai oportunidade ida ba CFTA atu hasa’e kapasidade agrikultór liu hosi formasaun prátika no modular.

Sr. Januario Marcal hateten mos katak tinan 2026 sei sai tinan transformasaun edukasaun agrikultór, ne’ebé MAPPF sei fó prioridade ba: Mekanizasaun moderna, Literasia digital no Agroteknologia

Nia mos hatutan katak dezenvolvimentu kuríkulu, 1) Kuríkulu tenke orienta ba meta nasionál, Kada módulu formasaun tenke aliña ho MAPPF nia vizaun atu hasa’e produtividade, inovasaun, no seguransa ai-han.. 2) Kuríkulu tenke prepara agrikultór mileniál ho vizaun futuru

Fó énfaze ba lideransa, empreendedorizmu, literasia dijitál, no sustentabilidade ambientál. 3) Kuríkulu tenke adaptativu no kontestuál,Programa formasaun tenke apropriadu ba kondisaun agro-ekolojia, sosiál no kulturál lokál.4) Kuríkulu tenke haburas rede no kolaborasaun

Formasaun tenke halo parseria ho setór privadu, organizasaun agrikultór, no instituisaun peskiza

Ikus liu, Diretor Nasional konvida partisipante sira hotu atu serbisu ho spiritu vizionáriu, abandona prátika tuan sira ne’ebé la relevante, no fó prioridade ba inovasaun atu harii jerasaun agrikultór millennial ida ne’ebé forte, produtivu no sustentável.