Aileu, 26 Janeiru 2026 – Sua Eselénsia Sekretáriu Estadu Kooperativas (SEKoop), Eng. Arsénio Pereira da Silva, M.Agr., hala’o vizita servisu ba Sentru Integradu Movimentu Kamponezes Timor-Leste (MOKATIL) Sarau, iha Aldeia Banderahun, Suku Liurai, Postu Administrativu Aileu, Munisípiu Aileu, ho objetivu hodi halo lansamentu kuda Bafo Kayrala no observa progresu dezenvolvimentu bafo ne’ebé kamponezes sira kultiva iha sentru refere.

Iha okazaun ne’e, SEKoop hato’o apresiasaun no parabéns ba MOKATIL, inklui nia estrutura no funsionáriu sira hosi Sekretaria Estadu Kooperativas, ne’ebé fasilita, organiza no halo monitorizasaun ba atividade agríkola sira, ne’ebé ohin loron hatudu rezultadu diak ba dezenvolvimentu ekonomiku kamponezes sira.

“Hau nia vizita dahuluk iha tinan ida ne’e mak ba Munisípiu Aileu, antes kontinua ba Munisípiu Covalima. Hau mai Sentru MOKATIL Sarau hodi observa diretamente progresu dezenvolvimentu Bafo Kayrala ne’ebé kamponezes sira kultiva iha sentru ida ne’e,” hateten SEKoop.

SEKoop esplika katak iha sentru refere, kamponezes sira kultiva Bafo Kayrala ho variadade tolu, hanesan bafo mean, bafo badak no bafo ain-naruk, ne’ebé bele hetan produsaun iha fulan sia nian. Sentru ne’e mos hala’o kultivasaun integradu ho kuda seluk, hanesan batar, lakeru, modo no hakiak fahi, atu aumenta rendimentu no seguransa ai-han ba membru sira.

Tuir SEKoop, modelu kultivasaun agríkola labele dependi de’it ba monokultura, maibé presiza diversifika ho komodidade seluk hodi responde ba nesesidade membru sira no uma kain, inklui fornese ba programa merenda eskolar, no mos oferese ba setor privadu hanesan Kompania Heineken hodi produz tuak ba produsaun serveja.

Vizita servisu ne’e simu ho di’ak hosi Prezidente MOKATIL Munisípiu Aileu, hamutuk ho funsionáriu munisipiál no kamponezes sira. Iha vizita ne’e, SEKoop akompaña hosi Xefe Gabinete, Sra. Francisca L. de Araújo Simith, nomos funsionáriu apóiu polítiku hosi Gabinete.

Hafoin remata vizita iha Sentru Integradu MOKATIL Sarau, SEKoop ho nia delegasaun kontinua vizita servisu ba Munisípiu Covalima, hodi observa atividade movimentu kooperativa no grupu produtivu sira, inklui fó pose ba estrutura Kooperativa Multi-Sektoral ILICHI no HAFUNAN LARAN METIN.