Joven na'in neen (6) hamutuk ho Lider Ekipa foin de'it remata jornada loron 11 iha rai Japaun liuhusi programa Ship for Southeast Asian and Japanese Youth Program (SSEAYP) ba dala 49.

Husi prefetura Nagasaki to'o Chiba, husi Universidade Tsukuba to'o hasoru malu ho Primeiru-Ministru Japaun no Prinsesa Imperiál, foin-sa'e sira-ne'e kadi-kbiit hodi prepara an ba futuru.

Sira la'ós de'it aprende teknolojia no Intelijénsia Artifišiál (AI), maibé sira hari'i pontu amizade ne'ebé labele naksobu. Agora, sira hi'it an ona ba Singapura hodi kontinua misaun boot ida-ne'e.

Le'e istória kompletu kona-ba sira-nia jornada, vizaun, no esperansa ba Timor-Leste iha artigu Feature tuir mai ne'e:

[FEATURE] ESKOLA IHA TASI-LETEN: JORNADA FOIN-SA'E SSEAYP HAKAT TASI-BOOT HODI BUKA NAROMAN IHA JAPAUN

Husi: Gabinete Komunikasaun no Informasaun (GCI) MJDAK

Iha lalehan ne’ebé malirin iha tasi-balun Japaun nian, foin-sa'e na'in neen (6) ho sira nia lider ekipa husi Timor-Leste hamriik ho fuan-kontente iha ró SSEAYP leten. Ba sira, viajen ne’e la’ós de’it pasiar hodi haree mundu, maibé ne’e mak "Eskola moris nian" ne’ebé loke sira-nia hanoin hodi sai lider foun ba futuru.

Husi Tasi-Ibun ba Mundu Globál;

Jornada Ship for Southeast Asian and Japanese Youth Program (SSEAYP) ba dala 49 ne’e, dudu foin-sa’e sira-ne’e hodi hakat liu sira-nia limitasaun. Durante loron 11 iha Japaun, sira espalla ba prefetura (sidade) oioin hanesan Chiba, Nagasaki, to’o Toyama. Iha ne’ebá, sira la’ós de’it sai vizitante, maibé sai "belun" ba família Japaun sira liuhusi programa homestay.

"Ami aprende katak, maske ita mai husi kultura ne'ebé la hanesan, maibé mehi ba dame no progresu mak hanesan," dehan partisipante ida ho lian ne’ebé nakonu ho orgullu.

Momentu ne’ebé furak liu mak bainhira sira hasoru malu ho Primeiru-Ministru Japaun no Prinsesa husi Família Imperiál. Iha ne’ebá, foin-sa’e sira sente katak Timor-Leste, maske nasaun foun, iha naran ne’ebé boot iha mundu internasionál.

Teknolojia no Fuan: Prepara an ba Futuru;

SSEAYP dudu sira hodi hatene liután oinsá teknolojia foun hanesan Artificial Intelligence (AI) bele ajuda komunidade. Husi vizita ba empreza boot sira to’o Universidade, sira foti lisaun katak "naroman" ne’ebé sira buka mak oinsá lori koñesimentu mai hodi dezenvolve fali baze iha Timor-Leste.

Hakat Tasi-Boot ho Bandeira Nasionál;

Iha loron 26 Janeiru, bainhira ró ne’e hahú sikat tasi-ibun Japaun hodi hi'it-an ba Singapura, iha foin-sa’e sira-ne’e nia matan-fuan, Japaun la’ós ona rai ne’ebé dook. Sira hi'it-aas Bandeira Nasionál ho laran-metin, katak juventude Timor-Leste prontu ona hodi hakat liu dezafiu mundu nian.

SSEAYP mak dalan ida hodi hari'i lideransa foun. Sira fila mai la’ós ho liman-mamuk, maibé lori matenek foun hodi kous mehi ba Timor-Leste ne’ebé nabilan liu.

Le'e notísia kompletu iha link website MJDAK iha okos ne'e: https://mjdac.gov.tl/.../28f0b864598a1291557bed248a998d4e/

#MídiaMJDAK #SSEAYP49 #EskolaTasiLeten #JuventudeTL #TimorLesteAvansa #Japaun