Dili, loron 27 fulan Janeiru – SEFOPE-DNEE hala'o seremónia despedida ba traballador Timoroan 42 ne'ebé sei servisu iha Austrália. Grupu ne'e kompostu husi mane 24 no feto 18, ne'ebé sei servisu iha kompañia 7 mak hanesan : PRIMARY HARVEST, NORA VALLEY/ FRAGATE, ADCO/RED DIRT MELONS, CONNECT GROUP/BANANA, MADEC TAS. ADCO/WEAS HILLS, no CONNECT GROUP.

Iha seremónia ida ne'e, hetan prezensa direta husi Diretór Diresaun Nasionál Empregu Estrangeiru (DNEE), Sr. João Correia Pereira, akompaña husi Adidu Traballu ba Australia, Sr. Rofino Lopes dos Reis, reprezentante Programa PLMSP, Sra. Maria Tavares, inklui Koordenador LSU, Sr. Eliterio Borges, D.S C. Lemos, iha edifisiu DNEE, City 8, Manleuana, Dili.

Iha sesaun diskursu Diretór (DNEE), Sr. João Correia Pereira hato'o mensajen importante ba traballador sira no sira nia família, hanesan tuir mai ne'e, "lori Estadu nia naran husu ba ita boot sira atu aproveita didi'ak oportunidade ida ne'e, servisu ho responsabilidade atu ita boot sira bele susesu iha futuru.” Diretór DNEE mos haforsa iha nia diskursu papel importante ida husi Departamentu Reintegrasaun mak atu kontinua apoiu traballador retornu sira ba susesu iha sira nia jornada, asegura sustentabilidade liu husi atividade no investimentu oin-oin ne’ebé sei hala’o iha futuru. Iha tempu hanesan, Diretór mos enkoraja família sira atu mantein komunikasaun diak ho traballador sira no kontinua suporta liu husi iha situasaun oin-oin ne’ebe traballador sira sei hasoru wainhira servisu iha Australia. Seremonia despedida nu’udar atividade regular ne’ebé realiza husi DNEE antes haruka traballador ba servisu iha rai liur.