Covalima, 26 Janeiru 2026 — Sekretáriu Estadu Kooperativas (SEKoop), Eng. Arsénio Pereira da Silva, M.Agr., halo vizita servisu ba Grupu Estrela Kari Fini iha Suku Kasbauk, Postu Administrativu Tilomar, Munisípiu Covalima, hodi observa direta atividade ekonómiku sira ne’ebé hala’o husi grupu refere.

Iha vizita ne’e, SEKoop observa atividade hanesan kuda ortikultura (pateka, baria, brinjela, modo no selu-seluk), rai no impresta osan, no mos pekuária hanesan hakiak fahi no manu, ne’ebé sai hanesan fonte rendimentu ba membru sira.

Sekretáriu Estadu Kooperativas hato’o nia apresiasaun ba progresu Grupu Estrela Kari Fini, maski grupu ne’e organiza husi inan-feton sira no fasilita husi World Vision Timor-Leste hamutuk ho IADE iha Munisípiu Covalima. Segundo nia, atividade produsaun no venda ba merkadu ne’ebé hala’o husi grupu ne’e hatudu rezultadu diak no kontribui diretamente ba dezenvolvimentu ekonomia membru sira nian.

“Grupu ne’e hatudu progresu ne’ebé diak loos. Atividade agríkola no pekuária ne’ebé hala’o bele fo kontribuisaun ba ekonomia uma kain nian no hodi harii independénsia finansiál ba membru sira,” hateten SEKoop.

SEKoop mos hatutan katak governu sei kontinua fó orientasaun no asisténsia téknika, liuliu formasaun bázika kona-ba kooperativa, hodi prepara grupu ne’e atu bele transforma sai kooperativa tuir lei, hodi garante sustentabilidade iha futuru.

Iha tempu hanesan, Xefe Grupu Estrela Kari Fini, Febiana Amaral, hato’o agradese ba vizita hosi SEKoop hamutuk ho autoridade munisipal sira, tanba bele haree direta sira nia atividade iha terenu. Nia dehan katak rezultadu husi atividade rai, impresta osan, ortikultura no pekuária ajuda ona membru sira hodi selu eskola oan sira nian, halo uma, sosa motor no finansia nesesidade seluk. Grupu Estrela Kari Fini harii iha tinan kotuk no agora iha membru nain 10, kompostu husi feto 7 no mane 3.

Vizita servisu ne’e mos marka prezensa hosi Reprezentante Prezidenti Autoridade Munisípiu Covalima, Sekretáriu Munisipal Asuntu Sosial no Organizasaun Komunitária Felomeno Cardoso, Diretór Agrikultura Munisípiu Covalima, IADE Covalima, Xefe Gabinete SEKoop Francisca L. de A. Simith, Diretór Nasionál Servisu Delegasaun Munisipal Rui Soares, Diretór Nasionál Dezenvolvimentu Kooperativas Gil Bento, no to’os nain sira.