Husi: GCI - MJDAK

Iha kalan ne’ebé udan kmaan (subiska) tun hodi habokon Estádiu 80th Birthday Anniversary iha Nakhon Ratchasima, Thailandia, jornada ida iha istória desportu Timor-Leste nian foin mak taka. Serimónia Enseramentu ASEAN Para Games ba dala 13 la’ós de’it festa iluminasaun no fugeti nian, maibé bensaun ida ba delegasaun Timor-Leste ne’ebé fila ho orgullu: Pozisaun dala 8 husi nasaun 10, ho totál medalla lima (5).

Maibé, se ita hateke liu fali númeru hirak ne’e, ita sei hetan istória ida ne’ebé kle’an liu tan kona-ba naran sira ne’ebé foti-aas dignidade Bandeira RDTL.

Timor-Leste hatudu duni ninia kbiit liuhusi para-atleta sira ne’ebé la rende ba limitasaun. Naran sira ne’ebé hakerek ona istória ho medalla mak:

1. Teofilo Freitas (Atletizmu): Domina pista ho Medalla Osan-Mean Rua (2), hatudu katak nia mak halai-na'in ne'ebé diak liu iha ninia kategoria.

2. Joaozinho Fernandes Araujo (Atletizmu): Konsege rekolla Medalla Osan-Mean (1), hodi aumenta tan ksolok ba povu Timor-Leste.

3. Romerio de Jesus (Atletizmu): Lori fila Medalla Osan-Mutin (1), nudar rezultadu husi ninia dedikasaun no espíritu luta ne'ebé maka'as.

4. Abelita Soares (Para Tenis Meza): Lori Medalla Bronze (1), hatudu katak iha modalidade tenis meza mós ita iha kbiit hodi hamriik iha podium leten.

Bainhira Bandeira RDTL hasae ho orgullu iha Thailandia, ne’e la’ós de’it sinál katak kompetisaun remata ona. Ne’e mak afirmasaun katak Timor-Leste mak nasaun ida ne’ebé inkluzivu no sei kontinua foti-aas sira ne’ebé luta ho fuan tomak.

Ho rezultadu 3-1-1, Timor-Leste hatudu progresu ne’ebé signifikativu hodi hamriik iha pozisaun dala 8. Investimentu ne’e ba “Lian” para-atleta sira-nian ne’ebé dalaruma sosiedade haluha.

Benvindu hikas mai Rain, Erói sira!

Imi-nia naran sei hakerek metin iha istória desportu nasionál.

#MídiaMJDAK