𝐃Í𝐋𝐈, 𝟑𝟎 𝐉𝐀𝐍𝐄𝐈𝐑𝐔 𝟐𝟎𝟐𝟔 - Sekretáriu Estadu Peskas, 𝐃𝐫. 𝐃𝐨𝐦𝐢𝐧𝐠𝐨𝐬 𝐝𝐚 𝐂𝐨𝐧𝐜𝐞𝐢çã𝐨 𝐝𝐨𝐬 𝐒𝐚𝐧𝐭𝐨𝐬 “𝐌𝐚𝐮-𝐜𝐚𝐫𝐨”, sesta ne’e soru-mutuk ho Ajénsia Internasionál JICA hosi Japaun, iha Salaun G-SEP, Comoro, hodi halo atualizasaun kona-ba planu enkontru alargada ne’ebé sei realiza iha Fulan Fevereiru.

Enkontru ne’e sei ko’alia kona-ba avaliasaun progresu servisu JICA nian ne’ebé durante ne’e lao hamutuk ho Ministériu Agricultura, Peskas no Florestas (MAPF), espesialmente ho Diresaun Jerál Peskas, Akikultura no Rekursus Mariñus, tutela iha Sekretáriu Estadu Peskas.

Iha diskusaun ne’e, parte rua mós reafirma kompromisu atu kontinua hasa’e kooperasaun téknika no institusionál, hodi asegura katak programa no atividade sira ne’ebé planeadu bele implementa ho di’ak no fó impaktu pozitivu ba setór peskas nian.

Kooperasaun servisu JICA ho Sekretáriu Estadu Peskas abrange área oioin, liuliu treinamentu ba peskadór sira, apoiu ekipamentu peskas, no apoiu seluk tan ne’ebé sei kontribui ba dezenvolvimentu sustentável setór peskas iha Timor-Leste.

Sekretáriu Estadu Peskas agradese apoiu husi JICA no hein katak enkontru alargada iha fulan Fevereiru sei sai hanesan fatin importante atu hametin koordenasaun no define diresaun servisu ba futuru.