Díli, 28 Janeiru 2026 — Sekretaria Estadu Kooperativa (SEKoop) halo parseiru ho Bali Business School (BBS) Internasionál, husi Indonézia, hodi halo diagnóstiku ba funsionáriu sira, nu’udar etapa inisiál antes fasilita formasaun atu hadia kapasidade rekursu umanu iha institusaun ne’e.

Iha sesaun abertura, Sekretáriu Estadu Kooperativa, Eng. Arsénio Pereira da Silva, M.Agr., hatete katak diagnóstiku ne’e importante tebes tanba liu husi prosesu ida ne’e, SEKoop bele hatene ho klaru kada funsionáriu sira nia kapasidade no nesesidade. Rezultadu husi diagnóstiku sei sai baza hodi planeia orasamentu no fasilita formasaun tuir nesesidade duni iha tinan sira tuirmai.

“SEKoop halo parseiru ho Bali Business School Internasionál husi Indonézia hodi diagnostiku funsionáriu sira, bazeia ba programa no Planu Asaun, hodi klasifika kapasidade funsionáriu sira no movimentu kooperativa sira, liu-liu kona-ba dijitalizasaun administrasaun ne’ebé seidauk diak tanba sei uza sistema manual,” hatete governante ne’e.

Sekretáriu Estadu haktuir tan katak atividade diagnóstiku ida ne’e foin primeira vez hala’o ba SEKoop, no rezultadu sira sei integra ba Planu Asaun Anual tinan 2027.

Iha fatin hanesan, Diretór Bali Business School Internasionál, Elvirius Ndruru, hatete katak prosesu diagnóstiku ohin loron mak etapa inisiál hodi avalia kapasidade rekursu umanu iha SEKoop.

“Ami agradese ba SEKoop tanba fó oportunidade ba Bali Business School hodi servisu hamutuk atu kontribui iha hadia kapasidade rekursu umanu, liu-liu iha área komunikasaun efetivu no análize administrasaun servisu públiku,” hatete Elvirius.

Diagnóstiku ne’e organiza husi Gabinete SEKoop, ho koordenasaun hamutuk ho diresaun sira hotu, no partisipa husi kargu diresaun no xefia sira, funsionáriu permanente, ajente administrativu, funsionáriu kazuál, inklui mós apóiu polítiku sira iha ámbitu Sekretaria Estadu Kooperativa.

Iha sesaun abertura, marka prezensa mós Diretór Geral SEKoop, Eng. Olderico Lopes, GIA; Inspetor Gaspar Policarpo Correia; no Xefe Gabinete, Francisca L. de A. Simith.