Díli, 02 Fevereiru 2026

Vice-Ministru Komérsiu no Indústria, Sr. Augusto Júnior Trindade, simu, iha loron Segunda-feira, iha Ministériu Komérsiu no Indústria (MCI), iha Mandarin, Díli, vizita kortesia husi Embaixadora Timor-Leste iha Austrália, Dra. Inês Almeida, ne’ebé akompaña ho investidór australianu sira.

Durante vizita ne’e, Embaixadora Dra. Inês Almeida apresenta investidór australianu sira ba Vice-Ministru, Diretór-Jerál sira no Diretór Nasionál sira, no husu informasaun kona-ba prosedimentu investimentu iha Timor-Leste, tuir lejislasaun ne’ebé vigora.

Iha okaziaun ne’e, Vice-Ministru felicita Embaixadora no destaka importánsia prezensa investidór estranjeiru sira iha rai laran. Nia hateten mos katak Ministériu Komérsiu no Indústria bele fasilita no koordena, hamutuk ho TradeInvest Timor-Leste, prosesu lejál sira no asuntu relevante seluk, se iha seriedade no kolaborasaun entre parte sira.

“Uluk iha ne’eba halo ona fórun empresariál ida, ne’ebé TradeInvest Timor-Leste fo ona informasaun kompletu kona-ba prosedimentu atu hala’o negósiu iha Timor-Leste. TradeInvest Timor-Leste mak hanesan odamatan importante ida ba investimentu ho eskala boot iha rai laran, no responsavel atu fornese informasaun kona-ba taxa sira no kriteria respektivu sira,” hateten.

Vice-Ministru informa mos katak, tuir dinamika ida ne’e, Ministériu Komérsiu no Indústria hahú ona analiza prosedimentu lisensiamentu indústrial. Reuniaun ne’e partisipa mos husi Diretór-Jerál Indústria, Diretór-Jerál Komérsiu, Diretór Nasionál sira, Xefe Departamentu sira, Xefe Gabinete sira no Asesor sira.