𝐃𝐢́𝐥𝐢, 𝟎𝟑 𝐅𝐄𝐕𝐄𝐑𝐄𝐈𝐑𝐔 𝟐𝟎𝟐𝟔

Vise Ministru Komersiu no Industria, Sr. Augusto Junior Trindade, atual lider Seinor Economic Official Meeting (SEOM) Timor-Leste partisipa abertura formasaun ne’ebé organiza husi Ministériu Negósius Estranjeirus no Kooperasaun (MNEC), hamutuk ho ERIA no apoiu husi Programa PROSIVU Governu Austrália, husi loron 3 to’o 5 Fevereiru 2026 iha Dili Convention Center (CCD), tersa ohin.

Objetivu husi formasaun ne’e atu hasae konesimentu no hametin partisipasaun Timor-Leste iha reuniaun no negosiasaun ASEAN nian.

Iha abertura ne’e Vise-Ministru Komérsiu no Indústria, Sr. Augusto Júnior Trindade, hateten kompromisu Governu atu hametin kapasidade funsionáriu sira no garante implementasaun di’ak ba kompromisu ekonómiku Timor-Leste nian iha ASEAN.

Treinamentu ne’e envolve pontu fokál setór sira no funsionáriu Governu ne’ebé servisu ho asuntu ASEAN, hodi ajuda sira kompriende di’ak liu kona-ba oinsá prepara reuniaun, halo negosiasaun no halo relatóriu hafoin reuniaun.

Programa ne’e uza métodu pratiku, inklui simulasaun reuniaun no negosiasaun ASEAN, atu ajuda partisipante sira aprende diretu no aumenta sira-nia kapasidade servisu. Atividade ida-ne’e suporta implementasaun Roteiru Nasionál Komunidade Ekonómika ASEAN 2026–2030 no ajuda Governu hametin koordenasaun no servisu hamutuk entre ministériu sira, atu Timor-Leste bele partisipa ho di’ak liu iha ASEAN.

Partisipa ba abertura formasaun ne’e mak Vise-Ministra Asuntu ASEAN, Embaxadora Australia iha Timor-Leste pontu fokal husi lineas ministeriais no konvidadus sira.