Dili, 3 Fevereiru 2026 — Ministériu Komérsiu no Indústria (MCI), iha koordenasaun ho departamentu ministeriál sira ne’ebé kompostu husi Komité Regra Orijen, hala’o enkontru traballu hodi ko’alia kona-ba pontu prioridade sira ba preparasaun Workshop ASEAN Trade in Goods Agreement (ATIGA ne’ebé sei realiza iha loron 10 -12 Fevereiru 2026).

Sesaun ne’e ofisialmente loke husi Diretór-Jerál Komérsiu, Sr. Nelito Lima de Araújo, ne’ebé subliña importánsia husi enkontru ne’e nu’udar pasu estratéjiku atu garante susesu husi workshop ne’e. Diretór-Jerál destaka nesesidade atu hamutuk halo análize no diskusaun kona-ba aspetu tékniku sira ne’ebé relasiona ho Regra Orijen, atu nune’e bele garante katak Timor-Leste preparadu didi’ak ba implementasaun akordu nian.

Diretor Jerál husu ba membru sira, atu rona didi’ak aprezentasaun husi fokal poin ATIGA, relasiona ho pontu importante sira ne’ebé Timor-Leste hala’o ona iha implementa akordu ATIGA. Tanba ne’e, DJ subliña katak, presiza iha kontribusaun husi parte hotu-hotu hodi haree no diskute hamutuk, atu nune’e bele ajuda fasilita prosesu workshop refere, hodi evita mosu fali preokupasaun no dúvida sira.

Aprezentasaun ne’ebé lidera husi Pontu Fokál ATIGA, Sra. Natalina Maria Amaral da Costa, foka liu ba progresu ne’ebé Timor-Leste alkansa ona iha implementasaun Akordu Komérsiu Sasán ASEAN nian, hodi destaka marku relevante sira no dezafiu sira ne’ebé la’o hela. Partisipante sira iha reuniaun ne’e, Ministériu Komérsiu no Indústria no parseiru denvolvimentu ne’ebe mai husi liña Ministerial sira.