𝐋𝐢𝐪𝐮𝐢𝐜𝐚, 𝟎𝟒 𝐅𝐞𝐯𝐞𝐫𝐞𝐢𝐫𝐮 𝟐𝟎𝟐𝟔

Vise Ministru Komérsiu no Industria Sr. Augusto Junior Trindade, hamutuk ho Ministru Transporte no Komunikasaun Sr. Miguel Marques Gonsalves Manitelo, reprezenta Ministru Koordenador Asuntu Ekonómiku, ho Komisaun D Parlamentu Nasionál ne'ebé trata Asuntu Ekonómiku, diskute espesialidade ba Proposta Lei Konkorensia n.º 19/VI (2.ª), iha Salaun IADE, Munisípiu Likisa, Kuarta ohin.

Lei Konkorrénsia ne’e ho objetivu atu estabelese kuadru legál ida hodi regula prátika konkorrensiál sira iha nasaun laran, promove merkadu ida ne’ebé justu no transparente. Proposta lei ne'e aprova ona jeneralidade iha Parlamentu Nasionál, ne'ebé aprejenta husi Ministériu Koordenador Asuntu Ekonómiku (MCAE) husi lei ne'e hamutuk artigu 29.

Lejislasaun foun ne’e buka prevene prátika monopolista no anti-kompetitiva, hodi garante ambiente konkorrénsia livre ne’ebé importante atu estimula inovasaun, atrai investimentu no hadi’a kualidade sasán no servisu sira ne’ebé oferese ba konsumidór sira. Rejime konkorrensiál foun ne’e mos sei kontribui ba kreximentu ekonómiku sustentável, ho promove ambiente negósiu ida ne’ebé atrativu liu, ba benefísiu konsumidór sira.