Objetivu husi enkontru koordenasaun ne’e, atu fó atensaun ba projetu Sentru Inkubasaun Nasional ne’ebe hanesan parte importante ba dezenvolvimentu ekonomia inovador iha Timor-Leste. Diskusaun ne’e fó prioridade, ba problema no mudansa sira ne’ebé mosu iha terenu no hamutuk buka solusaun ho ekipa téknika no parte interessada sira.

Iha parte aprezentasaun, kompañia Kai Watu Kmanek Konsultant, Unipessoal Lda hamutuk ho PT Pola Teknik Konsultant fó klarifikasaun, ba planu inisial projetu liuhosi Kickoff Meeting, ne’ebé orienta diresaun implementasaun konstrusaun sentru inkubasaun.

Sentru Inkubasaun Nasional Dili, sei sai plataforma importante atu sustenta inovasaun, empreendedorizmu no dezenvolvimentu empreza mikro, pekena no média iha Timor-Leste, hodi fó kontribuisaun ba diversifikasaun ekonomia no fortalese kapasidade juventude empreendedora.

Partisipa iha enkontru ne’e maka, Diretor Jeral Indústria, Diretor Nasional Dezenvolvimentu Mikro, Pekena no Média Empreza, representante husi Ministériu Obras Públiku, AIFAESA I.P no ADN.