𝐋𝐢𝐪𝐮𝐢𝐜𝐚, 𝟎𝟓 𝐅𝐞𝐯𝐞𝐫𝐞𝐢𝐫𝐮 𝟐𝟎𝟐𝟔

Vise Ministru Komérsiu no Industria Sr. Augusto Junior Trindade, kontinua hamutuk ho Ministru Transporte no Komunikasaun Sr. Miguel Marques Gonsalves Manitelo, reprezenta Ministru Koordenador Asuntu Ekonómiku, ho Komisaun D Parlamentu Nasionál ne'ebé trata Asuntu Ekonómiku, diskute espesialidade ba Proposta Lei Konkorensia n.º 19/VI (2.ª), iha Salaun IADE, Munisípiu Likisa, Kinta ohin.

Tama loron daruak diskusaun espesialidade Proposta Lei Konkorensia husi artigu 10 too 20 no sei iha artigu 9 ne'ebé sei diskute loron datolu ka loron ikus tuir ajenda ne'ebé Komisaun D Parlamento Nasionál fó sai. Totál artigu Proposta Lei refere hamutuk artigu 29 no aprova ona jeneralidade iha Parlamentu Nasionál, ne'ebé aprejenta husi Ministériu Koordenador Asuntu Ekonómiku (MCAE).

Lei Konkorrénsia ne’e ho objetivu atu estabelese kuadru legál ida hodi regula prátika konkorrensiál sira iha nasaun laran, promove merkadu ida ne’ebé justu no transparente.

Partisipa diskusaun ne'e mak Membru Komisaun D hamutuk nain 10, membru Governu nain 2 hamutuk ho Asesór sira husi Ministériu Komérsiu no Industria no Ministériu Koordenador Asuntu Ekonómiku no Tekniku sira husi Parlamentu Nasionál.