Dili loron 4, fulan Fevereiru, tinan 2026, Sekretáriu Estadu ba Formasaun Profisionál no Empregu (SEFOPE), Sua Exelénsia Rogério Araújo Mendonça L.Ed, hamutuk ho Embaixadora Nova Zelandia, Helen Tunah, partisipa iha seremonia asina deklarasaun ba traballadór Timor-oan nain 10 molok sira ba servisu iha nasaun Nova Zelândia.

Timor-Leste adere ona ba programa Recognised Seasonal Employer (RSE) iha tinan kotuk, hanesan parte husi esforsu atu dezenvolve forsa traballu nasional. Antes seremonia despedida ne’e, governu liu husi SEFOPE halo preparasaun hanesan MoU mobilizasaun RSE, rekrutamentu online, verifikasaun dokumentu, avaliasaun língua no intervista direta entre empregadór ho kandidatu sira.

Embaixadora Helen Tunah iha nia diskursu hatete programa ne’e importante tebes tanba ajuda ema idak-idak Timor-Leste atu hetan susesu liuhusi esperansa ba dezenvolvimentu kapasidade.

“Prosesu ne’e lao ho di’ak no transparante, imi mak pilotu dahuluk, hanesan embaixadór ba imi nia nasaun,” tenik embaixadora iha nia diskursu.

Sekretáriu Estadu hatete oportunidade ida ne’e mak loron importante ba Timor-Leste, ohin Timoroan na’in 10 hetan oportunidade, imi sei lori nasaun nia naran hanesan embaixadór, hatudu dedikasaun, responsabilidade no maturidade iha ema nia rai.

“Agradese ba familia traballadór imi nafatin suporta traballadór sira, tanbá sira sei ba aprende abilidade foun atu fila fali mai lori koñesimentu hodi kontribui ba ekonomia nasional," tenik Sekretáriu Estadu.

" hau husu ita boot sira atu uza oportunidade ne’e ho didiak atu nune’e iha futuru bele gaña mos kompañia sira-nia interese hodi bele simu ita-nia joven sira iha futuru oin mai." Hateten Sekretáriu Marcos da Costa Dias, hanesan representante traballadór na’in 10 agradese ba koperasaun entre governu Timor-Leste no Nova Zelandia.

“Difisil atu husik familia, maibe hanesan embaixadór ba Timor-Leste, ami sei komitmentu, disiplina no respeitu regras Nova Zelandia nian atu kria oportunidade barak liután ba kolega seluk iha futuru,” tenik traballadór. Traballador nain 10 ne'e sei ba servisu iha area hortikultura no vitikultura iha Nova Zelandia.

Seremonia ne’e mos partisipa hosi Secretáriu Estadu Arte no Kultura, Sekretáriu Estadu ba Dezenvolvimentu Rural, ekipa Nova Zelandia, representante MNEK, reprezentan PAM Dili, reprezentante SEI, mos iha, kargu diretores no funsionariu SEFOPE no familia traballadór sira.