Likisa, 04 Fevereiru 2026

Vise-PM Interinu no Ministru Koordenadór Asuntu Ekonómiku no Ministru Turizmu Ambiente atuál Ministru Transporte no Komunikasaun, Eng.Miguel Marques Gonçalves Manetelu akompaña husi Vise-Ministru Komersiu no Industria, Augosto Junior kuarta ohin hamutuk ho komisaun D parlamentu nasionál ne'ebé trata bá Asuntu Ekonómiku, diskute espesialidade bá Proposta Lei Konkorensia n.º 19/VI (2.ª), iha Salaun IADE, Munisípiu Likisa.

Lei Konkorrénsia ne’e ho objetivu atu estabelese kuadru legál ida hodi regula prátika konkorrensiál sira iha Timor-Leste, promove merkadu ida ne’ebé justu no transparente.

Proposta lei ne'e aprova ona jeneralidade iha Parlamentu Nasionál, ne'ebé aprezenta husi Ministériu Koordenador Asuntu Ekonómiku (MCAE) husi lei ne'e hamutuk artigu 29.

Lejislasaun foun ne’e buka prevene prátika monopolista no anti-kompetitiva, hodi garante ambiente konkorrénsia livre ne’ebé importante atu estimula inovasaun, atrai investimentu no hadi’a kualidade sasán nomos servisu sira ne’ebé oferese bá konsumidór sira.

Rejime konkorrensiál foun ne’e mós sei kontribui bá kreximentu ekonómiku sustentável ho promove ambiente negósiu ida ne’ebé atrativu liu bá benefísiu konsumidór sira.

Diskusaun ne'e sei kontinua aban no hetan prezensa masimu husi deputadu sira hosi Komisaun D, Tékniku sira hosi MCAE no Asesór sira.

𝐌𝐞́𝐝𝐢𝐚 𝐌𝐓𝐊