𝐃Í𝐋𝐈, 𝟎𝟔 𝐅𝐄𝐕𝐄𝐑𝐄𝐈𝐑𝐔 𝟐𝟎𝟐𝟔 – Atu kontinua hametin parseria entre Governu Timor-Leste ho Parseiru Internasionál Food and Agriculture Organization (FAO), sesta ne’e, Sekretáriu Estadu Peskas, 𝐃𝐫. 𝐃𝐨𝐦𝐢𝐧𝐠𝐨𝐬 𝐝𝐚 𝐂𝐨𝐧𝐜𝐞𝐢çã𝐨 𝐝𝐨𝐬 𝐒𝐚𝐧𝐭𝐨𝐬 “𝐌𝐚𝐮-𝐜𝐚𝐫𝐨”, Reprezenta Ministru Agrikultura, Pekuária, Peskas no Florestas, hodi akompaña Ministru Negócio Estranjeiru no Kooperasaun, Sr. Bendito Freitas, iha serimónia Asinatura Akordu Host Country (HCA) no Lansamentu Country Programming Framework (CPF), ho Dr. Alue Dohong, FAO Assistent Director-General, iha salaun MNEC, AV. de Portugal.

Assinatura ne’e nu’udar etapa estratéjika atu hametin kooperasaun entre parte rua iha área agrikultura, pekuária, peskas no florestas. Akordu ne’e reflete komitmentu Governu Timor-Leste no FAO atu servisu hamutuk hodi hasa’e seguransa ai-han, nutrisaun, produtividade agríkola no peskeira, no promove dezenvolvimentu sustentável ba povu Timor-Leste.

Iha atividade importante ne’e, Sekretáriu Estadu Peskas, Dr. Domingos da Conceição dos Santos “Mau-caro”, reprezenta Ministru Agrikultura, Pekuária, Peskas no Florestas, hato’o diskursu ofisiál. Iha nia liafuan, nia subliña katak kooperasaun ho FAO sei fó apoiu tékniku no instituisionál hodi hadia kapasidade nasionál, hasa’e produsaun no hadia moris komunidade agrikultór no peskadór sira iha rai-laran.

Asinatura akordu ne’e nu’udar símbolu komitmentu forte ba parseiru entre Governu Timor-Leste no FAO. Partisipa iha serimónia ne’e, Sekretáriu Estadu Florestas, Eng. Fernandino Vieira da Costa, Korpu Diplomátiku no Funsionáriu sira.