Ministra Edukasaun, Dulce de Jesus Soares, partisipa iha gravasaun epizódiu ba dala 18 hosi programa Pájina do Governo, ne’ebé hala’o ohin, iha loron 6 fulan-fevereiru tinan 2026, iha ámbitu hosi entrevista série foun hamutuk ho membrus Governu Konstitusionál IX.

Durante entrevista ne’e, Ministra ko’alia kona-ba prioridade prinsipál, dezafiu no orientasaun estratéjika sira hosi polítika nasionál edukasaun nian, ho destaka ba reforsu hodi asesu ba edukasaun, hadi'a kualidade aprendizajen, promove inkluzaun no oportunidades hanesan, nune’e mós kualifikasaun populasaun nian.

Uainhira ezerse ninia kompeténsia, Ministra Edukasaun mak responsavel ba konsesaun, ezekusaun, koordenasaun, no avaliasaun ba polítika públika sira iha área edukasaun no kualifikasaun, hahú husi edukasaun pre-eskolár to’o ensinu sekundáriu, inklui modalidade edukasaun espesiál, promove aprendizajen durante moris tomak, konsolida, nune’emós valoriza lian ofisiál sira. Nia mós responsavel atu asegura direitu ba edukasaun, define kurríkulu nasionál, garante kualidade sistema edukasaun, promove formasaun no valoriza profisionál edukasaun sira.

Promove hosi Gabinete Portavós Governu nian, lidera hosi Ministru Prezidénsia Konsellu Ministrus, Agio Pereira, programa "Página do Governo" ne’e halo produsaun iha parseria ho Rádiu no Televizaun Timor-Leste no mídia nasionál sira, ho objetivu atu hametin transparénsia governu nian, prestasaun kontas no asesu sidadaun sira ba informasaun kona-ba desizaun prinsipál no polítika ezekutivu sira-nian.

Aprezenta hosi Nélia Chaves no ho Ika Moniz hanesan produtora ezekutiva, "Página do Governo" sai hanesan espasu ida ba diálogu institusionál, ne'ebé foka liu ba interese públiku nian, atubele garante populasaun sira-nia asesu ba asaun no desizaun prinsipál Ezekutivu sira nian.

Epizódiu ohin nian, hamutuk ho Ministra Edukasaun, no epizódiu ida seluk ne’ebé grava horisehik, ho Ministru Juventude, Desportu, Arte no Kultura, sei transmite iha tempu badak iha RTTL no iha plataforma dijitál no rede sosiál Governu nian. Programa hotu ne'ebé transmite tiha ona disponivel iha kanál YouTube @PCMPAGINADOGOVERNOTIMORLESTE.

VISITA LINK PORTAL DO GOVERNO  https://timor-leste.gov.tl/?p=47232&n=1