Aileu – 4 Fevereiru 2026 , Ministerio Agrikultura Pekuaria Peska no Floresta (MAPPF) liu husi Servisu Estensaun Munisipiu Aileu Postu Lekidoe foin lalais ne’e hala’o sorumutu harmonizasaun no aprezentasaun progresu servisu hamutuk ho Administradór Postu no Xefe Suku sira iha Lekidoe, Munisípiu Aileu.

Objetivu husi enkontru ne’e mak atu melhora liután koordenasaun entre tékniku estensionista sira ho autoridade lokál sira , hodi hametin koperasaun iha implementasaun programa agrikultura nian iha suku laran. Sorumutu ne’e sai hanesan fatin ida atu avalia progresu no buka solusaun ba dezafiu sira ne’ebé agrikultór sira enfrenta iha postu refere.

Iha biban ne’e, Servisu Estensaun entrega mós ekipamentu agrikultura balu ba Postu hodi apoia servisu iha kanteiru. Atividade ne’e ramata ho asaun kuda ai-oan hanesan Tanjarinhas no Rambutan iha área Postu nian, nu’udar símbolu ba esforsu diversifikasaun ai-fuan no dezenvolvimentu rurál ne’ebé sustentável iha Postu Lekidoe.