BAUCAU, 06 Fevereiru 2026 – Governu liuhusi Primeiru-Ministru, Kay Rala Xanana Gusmão, hamutuk Ministru Obras Publicas, S.E Samuel Marçal akompaña husi Vise-Ministru ba Asuntus Parlamentares (VMAP), S.E. Adérito Hugo da Costa, sexta-feira ne’e, lansa ofisialmente projetu reabilitasaun estrada urbanu iha sidade Baucau.

Eventu ne’ebé marka pasu foun ba modernizasaun infraestrutura iha sidade sentenária ne’e, hala’o iha área Villa Antigu, Baucau.

Lansamentu ne’e akompaña ho serimónia selebrasaun kontratu entre Estadu liuhusi Ministériu Obras Públika (MOP) ho Kompañia Jova, ne’ebé sei sai responsavel ba ezekusaun obra refere. Ministru Obras Públika, Samuel Marçal, ne’ebé mós prezente iha fatin, esplika katak projetu ne’e parte husi planu boot Governu nian hodi hadi’a konektividade iha munisípiu sira, liliu iha Baucau nu’udar sidade segundu boot iha Timor-Leste.

Obra ne’e kobre reabilitasaun ba estrada sira iha zona urbana, inklui sistema drenajen hodi evita inundasaun no mós instalasaun naroman estrada nian (pasa-mão/luzes), ne’ebé sei fó oin foun ba sidade Baucau.

Iha diskursu, Primeiru-Ministru Kay Rala Xanana Gusmão fó hanoin ho lian maka’as ba kompañia ezekutor sira kona-ba kualidade servisu. Xefe Governu subliña katak osan Estadu nian tenke rezulta iha obra ne’ebé tahan ba tempu naruk.

“Imi nu’udar kompañia, keta mai buka de’it lukru ka osan. Servisu ba Estadu ne’e kumpri dever ida ba povu. Povu hein naruk ona ba estrada ida di’ak, tan ne’e ha’u la lakohi rona fali katak fulan hira de’it estrada ne’e nakfera fali,” dehan Xanana ho firme.

Nia mós hatutan katak prezensa komunidade nian ne’ebé barak iha lansamentu ne’e, sai sasin katak dezenvolvimentu ne’e urjente no sai nu’udar mehi ne’ebé povu Baukau hein kleur ona.

Iha momentu emosional ida, PM Xanana mós fó omenajen ba veteranu no katuas/ferik sira husi Baucau. Nia rekoñese katak sira-nia luta iha pasadu mak sai fundasaun ba dezenvolvimentu ohin loron nian.

“Imi mak terus hodi duni sai inamigu, imi mak heróis ba rai ne’e. Ohin ita ukun-an ona ba tinan 24, tempu ona ba imi no mós ita-nia jerasaun foun atu goza rezultadu husi independénsia ne’e. Estrada ne’e ba imi, ba imi-nia oan sira hodi tane ita-nia rai,” tenik PM Xanana hodi anima komunidade.

Ho reabilitasaun estrada urbana ne’e, espera katak sei fasilita movimentu transporte públiku, hasa’e atividade ekonómika iha merkadu, no mós dada turista sira atu mai vizita patrimóniu istóriku sira iha Villa Antigu.

Iha biban ne’e, partisipasaun Vise-Ministru ba Asuntus Parlamentares, S.E. Adérito Hugo da Costa, iha mós signifikadu boot hodi hametin kbiit koordenasaun entre Ezekutivu ho Parlamentu Nasionál. Nia prezensa ne’e hanesan forma ida husi fiskalizasaun hodi asegura katak orsamentu ne’ebé aprova ona iha Parlamentu Nasionál ba projetu infraestrutura sira, implementa duni ho di’ak hodi responde ba nesesidade povu nian.

Serimónia ne’e remata ho korta fita simboliku no perfurasaun primeiru ba estrada, ne’ebé asiste husi Autoridade Munisipál Baukau, Lideransa Komunitária, Estudante, no Veteranu sira no mós membru Governu sira.

Fontes: https://vmap.gov.tl/2026/02/07/vmap-akompana-pm-xanana-no-mop-lansa-ofisialmente-obra-estrada-urbana-baucau/