𝗗Í𝗟𝗜, 𝗠𝗝 — 𝗦𝗲𝘀𝘁𝗮-𝗳𝗲𝗶𝗿𝗮, 𝟬𝟲 𝗙𝗲𝘃𝗲𝗿𝗲𝗶𝗿𝘂 𝟮𝟬𝟮𝟲, Sua-Eselénsia Ministru Justisa, Dr. Sérgio de Jesus Fernandes da Costa Hornai, realiza serimónia ofisiál hodi asina Memorando de Cooperação (MdC) ho Sekretáriu Jenerál, Comunidade Sant’Egidio, Sr. Cesare Zucconi. Serimónia ne’e, hala'o liuhosi plataforma online (zoom meeting) iha Gabinete Ministru Justisa, edifísiu Ministériu Justisa, Kolmera, Díli.

Assinatura MdC ne’e, reflete komitmentu forte hosi parte rua atu hametin kooperasaun no servisu hamutuk, hodi garante implementasaun programa registu sivíl, liu-liu registu moris, ba povu kbi’it laek sira ne’ebé moris no hela iha área rural no área remota sira, atu asegura direitu sivíl no asesu ba servisu báziku hosi Estadu

Comunidade Sant’Egidio, ne’ebé hetan apoiu finanseiru hosi Ministério dos Negócios Estrangeiros República Italiana, sei servisu hamutuk ho Direção-Geral dos Registos e Notariado hodi presta servisu registu sivíl ba komunidade sira ne’ebé hela liu iha área ne'ebé rurál tebes.

Parte rua ne’e, konsidera katak registu sivíl mak elementu importante no fundamental ba konstrusaun nasaun ida ne’ebé forte no sustentavel. Liuhosi registu sivíl, Governu no institusaun relevante sira bele hetan dadus demográfiku ne’ebé loos, atual no kredível kona-ba populasaun, hanesan númeru rezidente, idade, jeneru, estado sivíl no fatin hela.

Tanba dadus sira ne’e sai nu’udar baze importante atu planeamentu dezenvolvimentu nasionál, formulasaun polítika públika, distribuisaun rekursu no fornese servisu sosiál sira ho efisiénsia no justisa.

# 𝗠í𝗱𝗶𝗮 𝗚𝗮𝗯𝗶𝗻𝗲𝘁𝗲 𝗠𝗶𝗻𝗶𝘀𝘁𝗿𝘂 𝗝𝘂𝘀𝘁𝗶𝘀𝗮 #

Fontes: https://www.facebook.com/share/p/1GsWdp3zRs/