Ermera, 06 Fevereiru 2026

Governu liuhosi Ministériu Komersiu no Indústria lansa fatuk da-huluk merkadu Gleno Ermera.

Vise-Primeiru Ministru Interinu, MAKE no MTA atúal Ministru Transportes no Komunikasaun, Eng.Miguel Marques Gonçalves Manetelu, hamutuk ho vise Primeiru-Ministru Mariano Assanami Sabino no membru governu balu lansa fatuk da-huluk bá konstrusaun Merkadu Gleno, Munisípiu Ermera.

Ministru Komérsiu no Indústria, Nino Pereira hateten, ohin marka tan pasu ida bá Dezenvolvimentu Komérsiu iha Timor-Leste espesiál bá povu iha Munisípiu Ermera.

"Merkadu foun Oportunidade foun bá dezenvolvimentu ekonomia lokál, ita tenke reforsa duni ita nia ekonómia lokál tanba dezenvolvimentu ekonómia nia baze mak fatór determinante bá progresu hotu bá dezenvolvimentu ekonomia nasaun nian." Dehan Ministru Komérsiu no Indústria, Nino Pereira iha nia diskursu hafoin tau primeira Pedra iha Gleno.

Vise-Primeiru Ministru Interinu, MKAE, no MTA, Eng.Miguel Marques Gonçalves Manetelu iha nia diskursu hateten Serimónia ida ne’e marka pasu importante ida esforsu Governu atu implementa Programa IX Governu Konstitusionál ne’ebé lidera husi Primeiru-Ministru Kay Rala Xanana Gusmão, liu-liu iha área dezenvolvimentu ekonomiku lokál, fortalesimentu merkadu doméstiku no hasa’e kondisaun moris komunidade rurál sira.

“Merkadu Gleno sei sai hanesan infraestrutura estratéjika ida ne’ebé suporta ligasaun entre setór agrikultura, komérsiu no ekonómia lokál. Governu iha konviksaun katak, merkadu ne’e sei kontribui bá hasa’e valór produtu lokál, promove produsaun nasionál no kria oportunidade rendimentu no empregu bá povu iha munisípiu ermera” dehan Ministru Manetelu.

Governante ne’e afirma Projetu ida ne’e reflete kompromisu Governu atu kontinua investe iha infraestrutura bázika no ekonómika iha munisípiu sira, hodi garante dezenvolvimentu inkluzivu, ekuitativu no sustentável, la konsentra de’it iha sentru urbana, maibé to’o bá komunidade rurál sira.

Iha oportunidade ida ne’e, Ministru Manetelu apresia no agradese bá Ministru Komersiu no Indústria, bá dedikasaun ne’ebé kontinua demonstra iha realizasaun prioridade Programa IX Governu Konstitusionál, liuliu iha área komérsiu, industria no fortalese merkadu lokál.

Alende ne’e mós hato’o apresiasaun bá Ministru Planeamentu no Investimentu Estratéjiku, bá papél importante ne’ebé dezempeña iha planeamentu, koordenasaun no implementasaun investimentu estratéjikus, hodi garante katak projetu hanesan Merkadu Gleno iha planeamentu ne’ebé sólidu, koerente no sustentável.

Governu espera katak prosesu konstrusaun bele hala’o ho responsabilidade no tuir padraun qualidade ne’ebé iha, hodi garante katak infraestrutura ida ne’e bele servi bá interesu públiku no bá gerasaun agora no futuru.

Governu hein katak Merkadu Gleno sei sai kontribuisaun konkretu bá dezenvolvimentu ekonómiku lokál no hasa’e moris di’ak liu bá populasaun Ermera.

Orsamentu bá konstruksaun merkadu Gleno, Ermera ho montante, dolar amerikanu $8.861.517,89, projetu ne'e implementa husi empreza Henan Fifth Construction, Group Co., LTD(China) husi Xina.

Partisipa iha lansamentu ne’e, membru governu, PAM Ermera, Diretór Munisípal Sira, Prezidente C-MCLN Ermera, Prezidente CCI-TL, Prezidente CCI-Ermera, Lidér Komunitáriu, Populasaun ermera, reprezentante komando PNTL Munisípiu Ermera, F-FDTL destaku munisípiu ermera no entidade estadu sira.

https://sdi.gov.tl/ministerio/presrealease/create

𝐌𝐞́𝐝𝐢𝐚 𝐌𝐓𝐊