Dili, 09 Fevereiru 2026

Ministru Transportes no Komunikasaun, Eng.Miguel Marques Gonçalves Manetelu Segunda ohin, halo enkontru ho Xefe Reprezentante JICA iha Timor-Leste, Daisuke FUKUMORI iha sala Gabinete Ministru Kaikoli Dili.

Ministru Manetelu lori Governu Timor-Leste nia naran hakarak hato’o agradesimentu bá povu no governu Japaun nia apoiu bá iha konstruksaun terminál pasajeiru Aeroportu Internasionál Prezidente Nicolau Lobato Comoro Dili.

“Uluk nanain, ha’u hakarak agradese bá governu Japaun no povu Japaun, liu-liu bá iha konstrusaun terminál pasajeiru aeroportu nian. Prosesu ne'e lori tempu naruk, maibé ikus mai ami hetan konkluzaun ida. Bazeia bá konvite, semana oin ha'u sei halo viajen bá Japaun hodi asina kontratu” dehan Ministru Manetelu.

Iha biban ne’e mós governante ne’e hakarak agradese bá eis Xefe Reprezentante JICA Timor-Leste Ito Mempei no mós eis embaixadór Japaun Kimura Tetsuya no bá sira-nia lideransa no mós embaixadór foun YAMAMOTO Yasushi, maske seida’uk hasoru malu ho embaixadór foun Japaun nia mai Timor-Leste, maibé fiar katak nia mós sei fó apoiu tomak bá prosesu sira-ne'e.

Xefe Reprezentante JICA iha Timor-Leste, Daisuke FUKUMORI agradese bá Ministru Manetelu nia lideransa hodi kontinua halo kooperasaun di'ak ho governu japaun liuhosi JICA nomos agradese bele konvida ona JICA hodi mai halo enkontru Antes halo viajen bá Japaun.

https://sdi.gov.tl/ministerio/presrealease/create 

𝐌𝐞́𝐝𝐢𝐚 𝐌𝐓𝐊