Manatuto (7/2/2026)-Ministério Agrikultura Pecuaria Pesca no Floresta (MAPPF) liu hosi Dirasaun Nasionál Agrikultura Hortikultura e Protesaun das Plantas entrega tan makina hand tratór Unidade 10 ba Prezidente Autoridade Municipal (PAM) Manatuto hodi bele apoiu agrikultór sira iha area natar. Seremonia entrega ekipamentu ne’e reliza iha resintu Diresaun Servisu Agrikultura Munisipio Manatuto.

Iha entrevista Diretór Nasionál Agrikultura Hortikultura e Protesaun das Plantas Lúcio Nuno esplika, MAPPF apoiu hand tratór unidade 10 ba iha Prezidente Autoridade Municipal Manatuto hafoin entrega tutan ba iha agrikultór sira atu bele apoiu agrikultór sira iha area natar no mós to’os.

Nia akresenta, antes ne’e MAPPF apoiu ona makina kuda hare,koa hare no tratór bo’ot balun husi orsamentu tinan 2025 ninian no orsamentu ba tinan 2026 Ministério sei propoin. makina hirak ne’e ba Munisipiu Manatuto mak hanesan; tratór bo’ot rua, makina kuda hare sanulu no mós makina koa hare lima, hand tratór unidade 16.

Iha fatin hanesan DSAM Manatuto Luis Inacio H. Fernandes hatutan, Ministério entrega Hand tratór mai iha Munisipiu Manatuto liu hosi Dirasaun Nasionál Protesaun das Plantas, tanba antes ne’e PAM ho Dirasaun servisu Agrikultura Munisipal halo ona monitorizasaun ba iha postu hirak ne’ebé mak agrikultór sira atu halo natar presiza duni ekipamentu hirak ne’e.

Rezultadu husi monitorisaun hatudu katak iha agrikultór balun presiza duni apoiu liu-liu Hand trator, entaun iha momentu ne’eba ita iha kordenasaun ho Ministério no Ministério halo desizaun hodi apoiu kedas Hand tratór mai iha Munisipio Manatuto. Tanba Hand tratór ne’ebé hetan apoiu husi MAPPF sei apoiu fali ba agrikultór sira ne’eb’e mak identifika ona liu husi monitorizasaun ne’ebé mak halo. Ekipa DMEA