𝐃í𝐥𝐢, 𝟎𝟗 Fevereiru 𝟐𝟎𝟐𝟔 – Ministru Komérsiu no Indústria, Sr. Nino Pereira, hala’o enkontru kortezia ida ho Konsul Jerál Dezignadu Repúblika Maldivas Sr. Bobby Mohanty, hodi ko’alia kona-ba dalan potensiál sira kooperasaun nian entre Timor-Leste, Índia, no Maldivas.

Enkontru ne'e hahú ho troka prezente simbóliku sira hosi Índia, no marka ho espíritu amizade no kolaborasaun nian. Konsul Jerál Honoráriu trasa área prioridade lima ba investimentu iha Timor-Leste: mina no gás, minerasaun no minerál, ensinu superiór, seguru, no agrikultura/prosesamentu ai-han.

Nia subliña posibilidade hosi empreza sira ne'ebé iha ligasaun ho governu indianu hodi apoia esplorasaun petróleu no gás Timor-Leste nian, enkuantu destaka mós oportunidade sira iha dezenvolvimentu mineiru no minerál sira. Iha edukasaun, nia propoin atu harii koléjiu médiku no enjeñaria iha Timor-Leste, hodi nota kompatibilidade kurríkulu sira entre Índia no Timor-Leste, ne’ebé bele haburas interkámbiu akadémiku no oportunidade aprendizajen sirkulár.

Diskusaun sira tuirmai kona-ba estabelesimentu servisu seguru nian, produsaun manu-tolun, indústria prosesamentu ai-han nian, no kriasaun parke industriál sira no zona ekonómika espesiál sira hodi atrai investimentu. Nia mos akresenta katak sira organiza forum negósiu balun iha Singapura, inklui Deli hodi fornese informasaun detallu oinsá atu investe iha Timor-Leste.

Ministru reafirma kompromisu governu nian atu apoia investidór sira liuhosi polítika relevante no kolaborasaun ho TradeInvest hodi fó informasaun detallu kona-ba setór potensiál sira. Parte rua konkorda atu kontinua diálogu, fahe dadus, no esplora pasu konkretu sira hodi hametin lasu ekonómiku sira.