Díli, 09 Fevereiru 2026 – Sekretaria Estadu Kooperativas (SEKoop), liu husi Direção Nasional Polítika da Reforma no Kapasitação em Gestão de Cooperativas (DNPRKGC), hamutuk ho Direção Nasional Delegasaun Munisipal, realiza formasaun kona-ba lala’ok kooperativas nian ba Grupu Rai no Impresta Osan Kofre ba Futuru, iha Salaun Igreja Surikmas.

Formasaun ne’e objetiva atu aumenta kapasidade dirijente no membru grupu sira kona-ba prinsipiu, administrasaun no jestaun kooperativa, hodi prepara grupu ne’e atu transforma aan sai kooperativa tuir lei no bele hala’o prosesu rejistu iha Notariadu.

Iha sesaun abertura, Sekretáriu Estadu Kooperativas, Eng. Arsénio Pereira da Silva, M.Agr., husu ba diresaun téknika sira atu la fó deit formasaun bázika, maibé tenki mos akompaña no fasilita prosesu transformasaun grupu sira ne’ebé eziste ona atu sai kooperativa legal.

“Governu, liu-liu Sekretaria Estadu Kooperativas, sempre iha prontidaun atu fasilita formasaun ba grupu no movimentu kooperativa sira ne’ebé hala’o atividade ekonómika. Setór kooperativa iha papél importante tebes iha dezenvolvimentu ekonomia iha rai laran, hamutuk ho setór públiku no privadu, hodi eleva ekonomia nasional no garante sustentabilidade ba futuru,” hateten Sekretáriu Estadu.

Nia mos husu ba diresaun téknika sira atu envolve mos Banku Sentral Timor-Leste (BCTL) iha formasaun hanesan ne’e, liu-liu iha materiál kona-ba dijitalizasaun finanseira no literasia finanseira, tanba SEKoop iha ona parseiria ho BCTL hodi suporta dijitalizasaun tranzaksaun finanseira iha movimentu kooperativa.

Iha tempu hanesan, Xefe Grupu Kofre ba Futuru hateten nia kontente tanba SEKoop simu pedidu grupu nian atu fasilita formasaun bázika ba dirijente no membru sira. Nia husu mos ba partisipante sira atu fó atensaun máximu durante prosesu formasaun, hodi bele implementa rezultadu formasaun iha grupu nia laran.

Grupu Kofre ba Futuru estabelese hodi hala’o atividade rai no impresta osan hahú husi tinan 2004 to’o 2012, depois atividade suspende, no iha tinan 2014 kontinua fali to’o ohin loron. Atualmente, grupu ne’e iha membru hamutuk ema 245 iha territóriu laran tomak, ho kapital osan hamutuk USD 212,114.00.

SEKoop informa mos katak atualmente iha kooperativa ne’ebé rejistu hamutuk 255, federasaun 15, no konfederasaun nasional 1, ho kapital hamutuk to’o USD 20 millaun resin.