𝐃𝐢𝐥𝐢, 𝟏𝟏 𝐅𝐞𝐯𝐞𝐫𝐞𝐢𝐫𝐮 𝟐𝟎𝟐𝟔

Vise-Ministru Komérsiu no Industria, Sr. Augusto Junior Trindade, akompania Ministru Agrikultura Peskas, Pekuaria no Floresta Sr. Marcos da Cruz no Sekretáriu Estadu Floresta Sr. Fernandino Vieira Da Costa, hamutuk ho Parlamentu Nasionál liu husi Komisaun D ne'ebé trata asuntu Ekonomia no Dezenvolvimentu hodi halo diskusaun espesialidade ba Proposta Lei n.º 21/VI (2.ª) – Lei Pestisida, iha Salaun IADE Munisípiu Likisa, kuarta ohin.

PPL ne'e aprejenta husi Ministériu Agrikultura Peskas Pekuaria no Floresta, ne’ebé aprova ona iha faze jeneralidade iha Parlamentu Nasionál hafoin Prezidente Parlamentu baixa ba Komisaun D hodi kontinua halo diskusaun ba espesialidade ho governu.

Proposta Lei Pestisida ne’e estabelese kuadru legál kompletu atu ajuda Governu regula utilizasaun pestisida iha territóriu nasionál, hahú husi lisensamentu importasaun no exportasaun, produsaun no distribuisaun, transportasaun, rejistu obrigatóriu ba produtu sira hotu, kontrolu kualidade no seguransa, jestaun uza, armazeniamentu no eliminasaun rízidu sira.

Proposta lei ne’e governu elabora kompostu husi kapítulu sia ho artigu hamutuk 39.

Tuir kalendariu husi Komisaun D katak diskusaun la'o durante loron 3 hahú husi 11-13 Fevereiru tinan ne'e.