Membru Parlamentu Nasionál, iha Sesaun Plenária segunda-feira, loron 09 fulan-Fevereiru tinan 2026, kestiona prosesu rekrutamentu ba kadetes foun Polísia Nasionál Timor-Leste (PNTL) ne’ebé deskonfiadu adopta sistema familiarizmu. Tanba ne’e, bankada opozisaun husu atu anula lista kandidatu ne’ebé foin publikadu hodi avansa ba rekrutamentu foun ho komisaun ne’ebé mai husi órgaun independente.

Deputada Maria Angelina Lopes Sarmento, husi Bankada PLP, iha ninia intervensaun hato’o keixa barak husi komunidade sira relasiona ho publikasaun lista naran kadetes foun PNTL, ne’ebé hatudu katak kandidatu balun nuda’ar oan ka família husi membru PNTL mak pasa iha prosesu rekrutamentu ida ne’e.

Deputada Maria Angelina Lopes Sarmento afirma katak prosesu rekrutamentu ne’e hatudu indikasaun politizasaun no fó kouta ba oan ka família membru polísia, ne’ebé hamosu preokupasaun boot iha komunidade sira kona-ba valór hametin lei no orden. Situasaun ne’e bele ikus mai lori PNTL sai hanesan instituisaun politizada no nakonu ho familiarizmu, organizasaun ka grupu ruma.

Membru órgaun lejislativu husi bankada opozisaun hatutan katak lista kandidatu ne’ebé públiku asesu ona ne’e hatudu indikasaun klaru familiarizmu, liuliu iha munisípiu Baucau, iha lista 2 ho númeru konkorente 4, naran Juvêncio da Costa Freitas, no konkorente númeru 7, Cicinando da Costa Freitas, ne’ebé nuda’ar maun no alin, ho inan no aman ne’ebé servisu hanesan komandante PNTL.

Relasiona ho kestaun ida ne’e, Deputada Maria Angelina Lopes Sarmento husu ba Komisaun B Parlamentu Nasionál atu halo intervensaun, no husu mós ba Ministériu Interiór no Komisáriu Jerál PNTL atu fó esplikasaun klaru kona-ba prosesu rekrutamentu ne’e. Nia mós husu atu pondera rezultadu rekrutamentu, inklui posibilidade anula desizaun sira ne’ebé kria diskriminasaun no injustisa.

Aleinde ne’e, deputada husu atu halo ezonerasaun ba Komisaun Rekrutamentu no hala’o investigasaun independente, tanbasá kandidatu balun ne’ebé la prienxe kritéria maibé bele pasa iha prosesu seleksaun. Nia mós sujere ba Ministériu Interiór no Komisáriu Jerál PNTL atu kria fali Komisaun Rekrutamentu kadetes foun husi órgaun independente, nune’e bele garante rezultadu ne’ebé justu no kredível, hodi hadi’a fali imajen no naran di’ak PNTL nian.

Opiniaun hanesan mós hato’o husi Deputadu Antoninho Doutel Sarmento, husi Bankada FRETILIN, ne’ebé hateten katak iha problema barak iha prosesu rekrutamentu membru foun PNTL nian tanba la hatudu independénsia no transparénsia, maibé dominadu liu husi sistema familiarizmu. Tanba ne’e, nia husu atu anula lista kadetes foun ne’ebé foin publikadu, hodi labele kria injustisa ba joven sira ne’ebé partisipa iha teste selesaun ne’e.

Entretantu, Deputadu Anacleto Freitas, husi Bankada CNRT, la konkorda, tanba prosesu rekrutamentu membru polísia foun fó oportunidade hanesan ba joven timoroan hotu-hotu atu konkore, inklui líder ka membru polísia sira nia oan.

Deputadu husi bankada governativa ne’e konsidera katak halo limitasaun ba oan polísia ka líder sira atu tuir teste kadetes PNTL bele sai hanesan forma diskriminasaun ba joven sira ne’ebé iha direitu hanesan atu konkore.

Plenáriu ordináriu ne’ebé diriji husi Prezidente Parlamentu Nasionál, Maria Fernanda Lay, ne’e, mós levanta kestaun sira seluk, inklui infraestrutura bázika, problema edukasaun, saúde, no deklarasaun polítika husi bankada parlamentár sira. (©MediaGVMAP)

Fontes: Bankada Opozisaun Husu Anulasaun Lista Kandidatu Foun PNTL | Portal GVMAP