Baucau, 06 Fevereiru 2026 – IX Governu konstitusional lidera husi Primeiru-Ministru, Kay Rala Xanana Gusmão, hamutuk Ministru Obras Publicas, S.E Samuel Marçal no akompaña husi Vise-Ministru ba Asuntus Parlamentares (VMAP), S.E. Adérito Hugo da Costa, sexta-feira ne’e, halo lansamentu ofisial ba projetu reabilitasaun estrada urbanu iha Municipiu Baucau.

Iha nia diskursu, Primeiru Ministru Xanana Gusmão hatete, konstrusaun estrada ne’e hanesan kontinuasaun husi planu governu nian ne’ebé aprova ona iha 2010 no 2011,

“Hau husu ba kompania Vage’el Unipessoal Lda. (Timor-Leste) ho Jova Konstruksion atu servisu ho diak, servisu ho kualidade, tanba osan nee povu nian, ne’ebé sosa ho ruin no ran, tanba ne’e tenke gasta ho diak.

“Imi nu’udar kompañia, keta mai buka de’it lukru ka osan. Servisu ba Estadu ne’e tenke kumpri dever ida ba povu. Povu hein naruk ona ba estrada ida di’ak.  Tan ne’e ha’u la lakohi rona fali katak fulan hira de’it estrada ne’e nakfera fali,” dehan PM Xanana ho lian makas “. Nia mós hatutan katak prezensa komunidade nian ne’ebé barak iha lansamentu ne’e, sai sasin katak dezenvolvimentu ne’e urjente no sai nu’udar mehi ne’ebé povu Baukau hein kleur ona.

Iha fatin hanesan, alein de lansamentu PM Xanana mos assiste direta serimónia asinatura kontratu entre Ministru Obras Públikas (MOP), Samuel Marçal ho na’in bá kompañia implementadór sira iha Baucau Vila Antiga.

Iha fatin hanesan Ministru Obras Públika, Samuel Marçal, esplika prosesu bá projetu ida ne’e lao lentu oituan ka laos lalais, antes implementa tenke halo estudu tékniku, halo dezenhu, prosesu hotu tenke la tuir lei, no prosedimentu aprovisionamentu.

“Hau hato’o agradese wai’in ba ita bo’ot sira ne’ebé ofesere ona. aihoris. hodi konstrui estrada. Hau mós husu ba joven sira labele halo impedementu. iha tempu badak mós ita sei lansa bee mós,”dehan Ministru Obras Públikas.

Entretantu reabilitasaun Estrada Urbana Pakote I (Seksaun 00+000-02+880.0 Ospitál Nagardjo – Baucau (Ospitál Rejionál Eduardo Ximenes), Munisípiu Baucau Kontratu: SSS/007/MOP – 2026, durasaun servisu fulan 24, projeitu ne’e sei fiskaliza husi ekipa tèkniku Ministériu Obras Públikas ho montante orsamentu $4,735,021.55, konstrui husi kompania Jova Construction Unipessoal Lda. (Timor-Leste) no.reabilitasaun Estrada Urbana Pakote III (Seksaun 1 – 5),Munisípiu Baucau Kontratu, SSS/008/MOP – 2026, durasaun servisu fulan 24, montante orsamentu $ 3,764,933.21 fiskaliza husi Ministériu Obras Públikas, kontratór Vage’el Unipessoal Lda. (Timor-Leste).

Durante serimonia lansamentu refere, prezensa Vise-Ministru ba Asuntus Parlamentares, S.E. Adérito Hugo da Costa, iha signifikativu boot hodi hametin linha koordenasaun entre Ezekutivu ho Parlamentu Nasionál.

no mos hanesan forma ida husi fiskalizasaun hodi asegura katak orsamentu ne’ebé aprova ona iha Parlamentu Nasionál ba projetu infraestrutura sira, implementa duni ho di’ak hodi responde ba nesesidade povu nian.

Serimónia ne’e remata ho korta fita simboliku no perfurasaun primeiru ba estrada, ne’ebé asiste husi Autoridade Munisipál Baukau, Lideransa Komunitária, Estudante, no Veteranu sira no mós membru Governu sira. (©MediaGVMAP)

Fontes: Governu IX Konsitusional lansa projetu rehabilitasaun estrada urbana Baucau Vila | Portal GVMAP