Dili, 02 Fevereiru 2026 – Reprezenta IX Governu Konstitusionál iha Reuniaun Plenária Parlamentu Nasionál, Vise-Ministru Asuntus Parlamentares (VMAP), S.E Adérito Hugo da Costa, afirma katak Ezekutivu foti ona medidas urjénsia hodi responde ba surtu moras Dengue ne’ebé  as iha rai-laran.

Resposta ne’e  hodi responde ba deklarasaun polítika hosi Bankada FRETILIN, liu hosi Deputada Helena Martins Belo, ne’ebé fó alerta ba kbiit sistema saúde nian hodi enfrenta vírus ne’ebé transmite hosi susuk Aedes aegypti. Deputada Helena subliña katak kondisaun iha Ospitál Nasionál Guido Valadares (HNGV) no sentru saúde balun sei falta ekipamentu médiku hodi fó atendimentu ne’ebé adekuadu, liuliu ba labarik sira.

Hodi fó kbiit ba pozisaun Governu nian, Vise-Ministru Adérito Hugo da Costa deklara “IX Governu tau atensaun sériu ba situasaun surtu dengue ne’e. Ami kontinua halo esforsu tomak hodi reforsa sistema saúde, prepara ekipamentu médiku, no garante katak pasiente hotu, tantu iha nivel nasionál mós iha sentru saúde sira, simu tratamentu ne’ebé dignu no efikas.”

VMAP mós salienta liutan katak Ministériu Saúde foti ona hakat preventivu no alerta nasionál hodi asegura katak atuasaun iha terrenu la’o ho efikásia hodi prevene impaktu boot liu ba saúde públika.

Alende kestaun saúde, Plenária ne’e mós rona relatóriu hosi Sekretáriu Komisaun D, Deputadu Saul Salvador H. J. Amaral, relasiona ho vizita fiskalizasaun ba Munisípiu Manatuto. Relatóriu ne’e foka ba implementasaun programa Merenda Eskolár ne’ebé sai nu’udar pilla importante ba desenvolvimentu labarik sira nian.

Komisaun D husu ba Governu atu Reforsa monitorizasaun ba kualidade ai-han iha eskola sira no Tau atensaun espesiál ba eskola filiál sira ne’ebé dook hosi sidade hodi garante katak labarik sira hotu simu benefísiu ne’ebé hanesan.

Reuniaun plenária ne’e prezide hosi Prezidente Parlamentu Nasionál, Sra. Fernanda Lay, ho partisipasaun másima hosi membru Governu no Deputadu sira hosi bankada hotu. Enkontru ne’e sai nu’udar plataforma importante hodi diskute dezafiu nasionál sira no buka solusaun ba kestaun ne’ebé afeta direitamente moris povu nian.

Aleinde diskusaun periode ordem do dia ne’e Parlamento Nacional mos kontinua kedas ho diskusaun iha jeneralidade ba Proposta Lei nº 21/VI (2ª) – Lei Pestisida. (©MediaGVMAP)

Fontes: Governu garante prioridade ba Surtu Dengue no reforsa sistema saúde iha Territóriu tomak | Portal GVMAP