JAPAUN, 25 JANEIRU 2026 – Delegasaun joven na'in neen (6) hamutuk ho Lider Nasionál (NL) na'in ida, foin de'it remata sira-nia jornada aprendizajen iha kampaña Ship for Southeast Asian and Japanese Youth Program (SSEAYP) ba dala 49 iha Japaun. Hafoin loron 11 tuir atividade oioin, delegasaun ne'e sei kontinua viajen hodi uza ró-ahi husi Japaun ba Singapura iha loron 26 Janeiru 2026.

Durante iha Japaun, partisipante sira partisipa iha Japan Local Program ne'ebé fahe ba Grupu Diskusaun (SG Group) husi letra A to'o J. Partisipante sira-nia knaar fahe tuir prefetura (prefecture) ne'ebé la hanesan hodi hatene liután kbiit lokál nian:

• Joven na'in rua (2) hala'o atividade iha Chiba;

• Na'in ida (1) iha Nagasaki;

• Na'in ida (1) iha Tokoshima;

• Na'in ida (1) iha Iwate;

• Joven na'in ida (1) hamutuk ho Lider Nasionál hala'o kobertura no atividade iha Toyama.

Diskusaun Temátika no Vizita Estudu Programa ida-ne'e foka mós ba dezenvolvimentu kbiit intelektuál liuhusi tópiku estratéjiku ne'ebé sai mós kestaun globál. Partisipante sira tuir vizita estudu ba instituisaun referénsia sira iha Japaun tuir sira-nia grupu diskusaun:

1. Edukasaun ho Kualidade: Vizita ba Universidade Tsukuba hodi fahe hanoin ho estudante sekundária sira.

2. Kresimentu Ekonómiku no Turizmu Sustentável: Observa servisu Divizaun Turizmu iha Sidade Kamakura no empreza públiku sira.

3. Ambiente Globál no Mudansa Klimátika: Vizita ba Tokyo Metropolitan Environmental Public Corporation.

4. Redusaun Risku Dezastre no Rekuperasaun: Estuda sistema foun iha Metropolitan Area Outer Underground Discharge Channel.

5. Bem-estár Sosiál no Inkluzaun: Koñese servisu Social Welfare Corporation “Kotoen”.

6. Sosiedade Dijitál no Intelijénsia Artifišiál (AI): Vizita ba SAP hodi aprende oinsá teknolojia ajuda empreza sira jere negósiu ho efisiénsia, hasa'e produtividade, no lukru iha tempu-reál.

Visita Kortezia ba Lideransa Japaun Iha biban ne'ebé hanesan, Líder Joven na'in rua (Youth Leader no Assistant Youth Leader) hamutuk ho Líder Nasionál husi nasaun Sudeste Aziátiku no Japaun, hala'o vizita kortezia ba Primeiru-Ministru Japaun no Prinsesa husi Família Imperiál Japaun. Enkontru ne'e hodi hametin relasaun amizade no diplomaia entre juventude sira iha rejiaun ne'e.

Partisipasaun Timor-Leste nian iha SSEAYP nudar pasu importante hodi kadi kbiit lideransa foin-sa'e sira nian hodi kontribui ba dezenvolvimentu nasionál iha futuru.

Lee notísia kompletu iha: https://mjdac.gov.tl

Akompaña nafatin ami iha média sosiál: https://www.facebook.com/mjdactimorleste/

#MídiaMJDAK #SSEAYP49 #JuventudeTL #DiplomasiaFoinSae #TimorLesteJapaun