Objetivu husi atividade ida ne’e atu suporta trabalhadór retornu sira hodi bele halo investimentu sustentável ba skill profissional no rekursu finanseiru ne’ebé sira hetan ona durante servisu iha Austrália, iha momentu hanesan aumenta mos partisipantes hotu nia koñesimentu no konsiénsia kona-ba importánsia integra prinsípiu inkluzaun sosiál iha família no komunidade.

Fasilitadór sira iha sesaun ne’e kompostu husi Departamentu Reintegrassaun DNEE, IADE (fasilita sesaun Formasaun Jestaun Negósiu), SERVE IP (fasilita matéria Prosesu no Rekezitu kona-ba legalidade atividade negósiu), inklui PRADET no SEI (fasilita matéria kona-ba Kuidadu Saúde Mental no Inkluzaun Sosiál). Aleinde ne’e, iha mós aprezentasaun husi programa Australia Awards Scholarship. Sesaun ida ne’e sei ajuda trabalhadór sira atu hetan informasaun sufisiente hodi aplika bolsa estudu karik sira iha interese.

Atividade ida ne’e hetan partisipasaun direta husi Diretor Jerál Servisu Korporativus SEFOPE, Sr. Nelson Soares Carvalho, no Diretor Nasionál Empregu Estranjeiru, João Correia Pereira, iha ambitu abertura semináriu. Durante diskursu, Diretor Jerál fo ênfaze katak, “Ita boot sira hetan ona oportunidade diak tebes hodi ba servisu iha Austrália, no hetan ona kapasidade finanseiru no koñesimentu iha ita boot sira-nia área ida-idak. Governu Timor-Leste mós servisu hamutuk ho Embaixada Austrália, hetan mós ajuda hodi fo ba ita boot sira liu husi inisiativa Auto-empregu Espesial.” Diretor Jerál mós enkoraja trabalhadór sira atu iha hanoin hodi loke negósiu ki’ik sira. “Governu iha esperansa boot katak iha futuru, ita boot sira la’ós de’it trabalhadór maibé tenki sai mós empregadór hodi ajuda Timor-oan sira seluk,” dehan Diretor Jerál.

Aleinde ne’e, Diretor DNEE mós sekunda katak, “Konvida ita boot sira atu hola parte iha atividade ne’e ho máximu, hodi bele aproveita didi’ak atividade ida ne’e. Atividade reintegrassaun ida ne’e mós la’ós halo de’it iha Dili, maibé semináriu reintegrassaun ne’e mós sempre halo iha munisípiu, tanba trabalhadór barak ne’ebé fila mai diretamente ba sira-nia munisípiu ida-idak, hodi bele partisipa mós iha atividade ida ne’e. Governu planu ona katak programa reintegrassaun hahú tinan ida ne’e sei aplika mós ba programa Japaun, Koreia no programa sira seluk karik nesesáriu,” dehan Diretor DNEE.