Maliana, 12 Fevereiru 2026 – Sekretaria Estadu Kooperativas (SEKoop), liu husi Diresaun Nasionál Promosaun Produtus Kooperativas (DNPPC), kontinua halo promosaun produtu lokal Bafo Kayrala iha Escola Bázika Central Tunibibi (EBC Tunibibi), Suku Holsa, Postu Administrativu Maliana, Munisípiu Bobonaro.

Promosaun ne’e foka ba introdusaun produtu final hanesan biskuit, sasoro, cokelat no pão ba estudante sira, hanesan parte husi inisiativa governu atu integra produtu lokal iha programa merenda eskolar. Objetivu principal maka atu hadi’a nutrisaun no saúde estudante sira, nune’e mos enkoraja sira atu hatene no konsumu produtu lokal.

Iha seremónia ofisiál, Sekretáriu Estadu Kooperativas, Eng. Arsénio Pereira da Silva, M.Agr., hatete katak EBC Tunibibi sai projetu pilotu iha Munisípiu Bobonaro ba promosaun produtu final Bafo Kayrala. Tuir nia, inisiativa ne’e la’ós de’it fó benefísiu ba estudante sira, maibé mos fó valor ba produtu agríkula lokal no fortalece ekonomia kooperativa sira iha Timor-Leste.

Diretór EBC Tunibibi hato’o nia apresiasaun ba SEKoop tanba fó oportunidade ba eskola atu sai parte husi programa importante ida ne’e. Nia dehan katak promosaun ne’e ajuda estudante sira komprende importánsia konsumu produtu lokal ne’ebé iha valor nutrisaun.

Estudante sira mos hatudu kontentamentu no entusiasmo tanba sabor no qualidade produtu Bafo Kayrala ne’ebé konsidera diak ba sira nia saúde.

Atividade ne’e hetan partisipasaun husi reprezentante Autoridade Munisípiu Bobonaro, Sekretáriu Munisipal ba Asuntus Administrasaun no Finansas, reprezentante PNTL Munisípiu Bobonaro, reprezentante World Vision Timor-Leste, Diresaun Munisipal Edukasaun no Saúde, no profesor sira.

Inisiativa ida ne’e fó esperansa atu iha futuru, produtu lokal sira bele integra ofisialmente iha menu merenda eskolar, hodi sustenta nutrisaun estudante sira no aumenta papel kooperativa sira iha dezenvolvimentu ekonomia nasional.