Liquiça, 13 Fevereiru 2026

Sekretaria Estadu Kooperativas (SEKoop) liu husi Diresaun Nasionál Gestaun Rekursus Umanus (DNGRH) servisu hamutuk ho Grace For Development (GFD) Training hodi realiza formasaun Lian Engles nível bázika ba funsionáriu sira ne’ebé servisu iha Liquiça. Formasaun ne’e hala’o durante fulan tolu nia laran no partisipa husi funsionáriu hamutuk ema nain 16, no estajiarou inklui partisipante sira hamutuk ema nain 40.

Iha serimónia enseramentu, Sekretáriu Estadu Kooperativas, Arsénio Pereira da Silva, M.Agr., fó parabéns ba partisipante sira no enkoraja atu kontinua aprende nafatin. Nia hateten katak iha mundu globalizasaun ohin loron, funsionáriu públiku sira presiza aumenta koñesimentu no kapasidade, inklui domina lian estranjeira hanesan Lian Engles, Mandarin, Portugués no selu-seluk tan, atu bele fó servisu di’ak liu ba povu no nasaun.

Diretór Nasionál Gestaun Rekursus Umanus, Aderito C. Gonzaga, hateten katak objetivu formasaun ne’e mak atu hadia kapasidade komunikasaun no kompeténsia profisionál funsionáriu sira. Nia husu ba partisipante sira atu aplika koñesimentu ne’ebé hetan iha fatin servisu lor-loron.

Nune’e mos, Diretór GFD Training, Hilario Gusmão Fraga, fó agradese ba SEKoop tanba fó fiar ba GFD hodi fasilita formasaun ne’e. Nia espera katak koperasaun entre instituisaun rua ne’e bele kontinua iha futuru. Ho realiza formasaun ida ne’e, SEKoop reafirma nia kompromisu atu dezenvolve rekursus umanus ne’ebé kompetente no prontu atu responde ba dezafiu servisu públiku iha Instituisaun SEKoop nian.

Serimónia enseramentu ne’e marka prezensa husi autoridade munisipál sira inklui Sekretáriu Munisipal ba Asuntus Planeamentu, Diretór Edukasaun Munisípiu Liquiça no Diretór Nasionál Servisus Delegasaun Munisipal, Rui Soares.