Same 13 Fevereiro 2026- Ministru Komérsiu no Indústria Sr. Nino Pereira, partisipa iha serimónia ofisiál kona-ba Lansamentu Exportasaun Produtu Floresta Não Madeira, ne’ebé halo iha Suku Betano, Postu Administrativo Same.

Produtu ne’ebé fó prioridade iha lansamentu ne’e mak tali musan “Corypha utan”, ne’ebé sei exporta ba Indonézia. Inisiativa ida ne’e la’ós deit fó valor ba produtu lokal, maibé mos hatudu kapasidade komunidade rural atu kontribui ba ekonomia nasionál liu husi utilizasaun sustentável no inovativu husi recursos naturais.

Ministru Nino Pereira subliña katak, exportasaun tali musan mak prova katak Timor-Leste bele sai parte ativa iha merkadu internasionál, ao mesmo tempo fó oportunidade ba komunidade lokal atu aumenta rendimentu ekonomiku. Lansamentu ida ne’e mos hatudu kompromisu governu atu fó prioridade ba diversifikasaun ekonomia, liu husi setor floresta não madeira, ne’ebé sustenta prinsipiu proteksaun ambiente no dezenvolvimento sustentável.