Parte ida husi atinjimentu husi komitmentu ne'e, ohin loron kandidatu traballadór PALM nain 25 kompostu husi (mane 15, Feto 10) , ofisialmente simu ona sira-nia sertifikadu ne'ebé oferese direitamente husi SEFOPE, Embaixada Austrália no CANEX, hafoin remata formasaun Kulinaria no House keeping durante semana rua.

Iha serimónia ida ne'e, marka prezensa direitamente husi SEFOPE–DNEE, reprezentante husi Chefe Departamentu Deslokasaun, Sr. Alarico Fernandes, Embaixada Austrália, inklui parseiru implementador sira hotu.

Maski hetan ona sertifikadu, maibé SEFOPE no Governu Austrália kontinua dezafia partisipantes sira atu buka nafatin oportunidade hodi aprende kle'an liu tan lisaun ne'ebé sira simu ona. Iha tempu ne'ebé hanesan, kapasita mós abilidade komunikasaun lian Inglés, hodi nune'e bele fó posibilidade boot liu atu hetan selesaun husi empregador sira iha futuru.

“Obrigado SEFOPE no Govenru Asutralia ne'ebé fó ona oportunidade ida ne'e mai ami. Liu husi oportunidade ida ne'e, ami bele aprende buat barak, liuliu iha área hospitalidade inklui kulinária. Ida ne'e fó mudansa boot tebes mai ami atu prepara ami-nia aan hodi ba servisu iha Austrália karik aban-bainrua empregador sira presiza ami,” dehan Abílio de Jesus Hornai, partisipante ida husi treinamentu refere.

Inisiativa refere demonstra esforsu kontínuu atu empodera foinsa'e Timor-oan sira ho kapasidade no kualifikasaun ne'ebé relevante ba merkadu traballu iha Australia.